ڕێکخراوی یوونیسێفی سەر بە نەتەوە یەکگرتووەکان هۆشداری دەدات لە دۆخی خراپی منداڵان لە سووریا و ڕایدەگەیەنێت بەهۆی شەڕ و قەیرانی ئابوورییەوە، سەدان هەزار منداڵ ڕووبەڕووی نەبوونی خۆراک بوونەتەوە.
ڕێکخراوی یوونیسێف بۆ کاروباری منداڵان، سەر بە نەتەوە یەکگرتووەکان، هۆشداریی توند لەبارەی دۆخی منداڵان لە سووریا دەدات و ڕایگەیاندووە، بەهۆی شەڕی بەردەوام، تێکچوونی دۆخی ئابووری و نائارامییەوە، منداڵانی ئەو وڵاتە لە دۆخێکی مرۆیی زۆر خراپدا دەژین.
بەپێی ڕاپۆرتی یوونیسێف، زیاتر لە ٦٠٠ هەزار منداڵی خوار تەمەن پێنج ساڵ لە سووریا تووشی قەیرانێکی سەختی بەدخۆراکی و نەبوونی خۆراک بوون و لەو ژمارەیەش، ١٧٧ هەزار منداڵ لە دۆخێکی تەندروستیی مەترسیداردان.
ڕێکخراوەکە لە ڕاپۆرتەکەیدا ئاشکراشی کردووە، بەهۆی دۆخی مرۆیی نالەبار لە سووریا، ١٦ ملیۆن و ٥٠٠ هەزار کەس پێویستییان بە هاوکاریی مرۆیی هەیە، کە ٧ ملیۆن و ٤٠٠ هەزاریان منداڵن. هەروەها ئاماژەی بەوەش کردووە، لە مانگی ئاداری ٢٠٢٤ـەوە، نزیکەی یەک ملیۆن و ٦٠٠ هەزار ئاوارە گەڕاونەتەوە سەر ماڵ و حاڵی خۆیان کە زۆرینەیان منداڵن.
