پشتیوان سادق، وەزیری ئەوقاف و کاروباری ئاینی ئەمڕۆ یەکشەممە، 10-8-2025، لە کۆنگرەیەکی ڕۆژنامەوانیدا ڕایگەیاند. لەمەودوا هەرکەسێک بیەوێت فەڕیزەی حەج بکات، دەتوانێت لە ڕێگەی مۆبایلەکەیەوە ناوی خۆی تۆمار بکات، هەروەها وەڵامەکەشی لەڕێگەی تیروپشکی ئەلیکترۆنی بۆ دەگەڕێتەوە.
گوتیشی: ئەو پرۆسەیە چەند خاڵێکی ئەرێنی هەیە، یەک لەو خاڵانە ئەوەیە داواکار ناوەکەی لەماڵی خۆی لەڕێگەی ئەلیکترۆنییەوە پڕدەکاتەوە و هەلی یەکسان بۆ خوازیاران دەردەچێت.
پشتیوان سادق ئاماژەی بەوەش دا، پیشتر برێک پارە لەبەرانبەر وەرگرتنی فۆڕمی حەج دەدرا، بەڵام ئێستا هیچ بڕە پارەیەک نادرێت و بەخۆڕایی فۆڕمەکە لەڕێگەی ئەلیکترۆنیەوە پڕ دەکرێتەوە، ئەمەش هاوتەریبی بەرنامەی حکوومەتی هەرێمی کوردستانە کە لەسەرەتاوە ویستوویەتی دامودەزگاکانی حکوومەتی هەرێم بە ئەلیکترۆنی بکرێت.
ڕاشیگەیاند، لە کوردستان سەدان هەزار کەس دەیەوێت فەریزەی حەج جێبەجێ بکات، هەروەها وەزارەتی ئەوقافیش لەساڵانی ڕابردوودا درێغی لە خزمەتکردنی حاجیان نەکردووە، کە ئەمساڵ خزمەتێکی باشیان پێشکەشی حاجیان کردووە بەراورد بە ولاتانی دیکە.
وەزیری ئەوقاف و کاروباری ئاینی باسی لەوەش کرد، پێشتر بانگدانی مزگەوتەکانمان ڕێکخستەوە و بە لیکترۆنیمان کردووە، کە لەڕێگەی بانگبێژە دەنگخۆشەکان بانگ دەدرێت و لەزۆربەی شار و شارۆچکەکانیش ئەو پرۆسەیە جێبەجێ دەکرێت.