مۆدێلە بچووکەکانی ژیریی دەستکرد ڕەنگە بەم زووانە بتوانن بەبێ پێویستی بە سەنتەرەکانی داتا و تەنها لە ڕێگەی ئامێرە زیرەکەکانی ماڵەوە خۆیان دووبارە بکەنەوە.
“ئانترۆپیک” هۆشداریی دا مۆدێلە بچووکەکانی ژیریی دەستکرد ڕەنگە لە ماوەی چەند مانگی داهاتوودا بتوانن بەبێ دەست
تێوەردانی مرۆڤ خۆیان لە ئامێرە پەیوەستەکانی ئینتەرنێتدا دووبارە بکەنەوە. ئەم توانایە دەتوانێت ببێتە هۆی دروستبوونی تۆڕێکی فراوان لە ئامێرە تووشبووەکان کە بە شێوەیەکی سەربەخۆ کار دەکەن و تەنانەت بۆ زیادکردنی توانای پڕۆسێسکردنی خۆیان دەچنە نێو سەنتەرەکانی داتاوە.
بە گوێرەی هەواڵی “ڕۆیتەرز”، ئانترۆپیک ڕۆژی دووشەممە ١٢ی ئۆکتۆبەر ڕای گەیاند تاقیکردنەوەکانی ئەم کۆمپانیایە نیشانیان داوە بریکارەکانی ژیریی دەستکردی زیانبەخش دەتوانن بۆ جێبەجێکردنی مۆدێلەکانی تر توانای پڕۆسێسکردنی کۆمەڵێک ئامێری هەرزانی پەیوەست بە ئینتەرنێتەوە بەکاربهێنن. ئەم ئامێرانە بریتین لە تەلەڤیزیۆنەکانی ئەندرۆید، کەلوپەلی ماڵی زیرەک، و کامێرای ئەمنیی کە زۆرجار پاراستنی ئەمنییەتیان لاوازە.
توێژەرانی ئانترۆپیک بۆیان دەرکەوت مۆدێلەکانی ٣٠ ملیار پارامەتەر یان کەمتر ئێستا دەتوانن زۆرێک لە قۆناغە پێویستەکانی خۆدووبارەکردنەوەی ئۆتۆماتیکی ئەنجام بدەن، بەڵام هێشتا لە جێبەجێکردنی دڵنیایی هەموو قۆناغەکاندا ڕووبەڕووی کێشە دەبنەوە. لەگەڵ ئەوەشدا، لە تاقیکردنەوەکاندا کە هەندێک لە بەربەستە ئەمنییەکان لابرا بوون، مۆدێلی “جی ئێڵ ئێم-٥.٢” و مۆدێلە بەهێزترەکان توانییان پڕۆسەی دووبارەکردنەوەکە لە سەرەتاوە تا کۆتایی ئەنجام بدەن.
ئانترۆپیک پێشبینی دەکات ئەگەر پێشکەوتنی مۆدێلە بچووکەکان بە خێرایی ئێستا بەردەوام بێت، ئەم مۆدێلانە ڕەنگە تا کۆتایی ساڵی ٢٠٢٦ توانای خۆدووبارەکردنەوەی سەربەخۆ بەدەست بهێنن. ئەم توانایە دەتوانێت نەوەیەکی نوێ لە تۆڕەکانی ناسراو بە “بۆتنێت” دروست بکات. بۆتنێتەکان کۆمەڵێک ئامێری تووشبوون کە بەزۆری بۆ ناردنی سپام، بڵاوکردنەوەی نەرمەکاڵای زیانبەخش، یان هێرشی سایبەریی فراوان بەکار دەهێنرێن.
جیاوازیی گرنگی تۆڕەکانی ژیریی دەستکرد لەگەڵ نەرمەکاڵا زیانبەخشە باوەکاندا، توانایانە لە ناسینەوە و خۆگونجاندن لەگەڵ ئامێرە نەناسراوەکاندا. ئانترۆپیک هۆشداریی داوە نەبوونی سەنتەرێکی کۆنترۆڵی تاک، کوژاندنەوەی ئەم جۆرە تۆڕانە قورس دەکات.
ئەم کۆمپانیایە لە هەمان کاتدا جەختی کردووەتەوە کە دووبارەکردنەوەی مۆدێلەکان لەسەر ڕەقەکاڵای لاواز ڕەنگە چەند ڕۆژێک بخایەنێت و بڵاوبوونەوەیان لە هەندێک نەرمەکاڵای زیانبەخشی باو خاوەنتر بێت. تاقیکردنەوەکان هێشتا توانای خۆدووبارەکردنەوەی سەربەخۆیان لە سەنتەرەکانی داتای بازرگانیدا نەسەلماندووە.
داریۆ ئامۆدی، بەڕێوەبەری جێبەجێکاری ئانترۆپیک، پێشتر هۆشداریی دابوو ژیریی دەستکرد ڕەنگە لە داهاتوویەکی نزیکدا بتوانێت بەشێکی فراوان لە ئینتەرنێت لە ڕێگەی تۆڕێکی جێگیر لە ئامێرە تووشبووەکانەوە کۆنترۆڵ بکات. ئەم هۆشدارییانە نیگەرانییەکانی سەبارەت بە بڵاوبوونەوەی هێرشە سایبەرییە ئۆتۆماتیکییەکان و سەختیی چاودێریی مرۆڤ لەسەر سیستەمە پێشکەوتووەکانی ژیریی دەستکردی زیاد کردووە.