مایک هاکبی، باڵیۆزی ئەمریکا لە ئیسرائیل، لە چاوپێکەوتنێکی تایبەتدا لەگەڵ کەناڵی “ئەلعەرەبیە” جەختی لەسەر هەستیاریی دۆخی ئێستا کردەوە و ڕایگەیاند، ئۆپەراسیۆنە سەربازییەکانی ئێستا لە غەززە دەتوانن ڕاستەوخۆ ژیانی بارمتەکان بخەنە مەترسییەوە.
هاکبی گوتی: “ئیسرائیل لەژێر فشارێکی زۆردایە بۆ ئەنجامدانی هەنگاوی یەکلاکەرەوە لە غەززە.”
باڵیۆزی ئەمریکا هەروەها ئاماژەی بە پرسی پلانی “E1” بۆ دابەشکردنی کەناری ڕۆژئاوا دا و گوتی، “ئەو پلانە پێشێلکاریی یاسا نێودەوڵەتییەکان نییە.”
لە بەشێکی دیکەی قسەکانیدا، هاکبی گوتی: “پێویستە ئەورووپا لە دەرەنجامە ئەگەرییەکانی داننان بە دەوڵەتی فەڵەستیندا تێبگات و قبووڵی بکات.” ناوبراو جەختیشی کردەوە، “جێبەجێکردنی چارەسەری دوو دەوڵەتی لەنێوان فەڵەستین و ئیسرائیلدا لە ئێستادا لە پێشینەی کارەکانی ئەمریکا نییە.”
لە کۆتاییدا هاکبی زیادی کرد: “فەڵەستینییەکان خۆیان بەرپرسیارن لە شکستی گەیشتن بە چارەسەری دوو دەوڵەتی.”