هونەرمەندی ناسراوی کورد، حەسەن شەریف، نوێترین بەرهەمی هونەریی خۆی بەناوی “عیسێ دەلا” بەشێوەی ڤیدیۆکلیپ بڵاوکردەوە، تێیدا دیمەنە دڵڕفێن و مێژووییەکانی شاری ئامێدی کردووەتە پاشخان.
بەرهەمە نوێیەکەی حەسەن شەریف لە ئاوازی خۆیەتی و لە تێکستی ئەدیب چەلکییە.
تایبەتمەندیی سەرەکیی ئەم ڤیدیۆکلیپە، شوێنی وێنەگرتنەکەیەتی. کلیپەکە لە نێو سرووشت و شوێنەوارە دێرینەکانی قەزای ئامێدی سەر بە پارێزگای دهۆک وێنەگیراوە. دیمەنی دەرگای ئامێدی، کۆڵانەکان و دیمەنی شاخاوی ناوچەکە، جوانییەکی تایبەتیان بە بەرهەمەکە بەخشیوە و لەگەڵ ناوەڕۆکی فۆلکلۆریی گۆرانییەکە یەکانگیرن.
“عیسێ دەلا” چیرۆکێکی دێرینی ناوچەکەیە و حەسەن شەریف ویستوویەتی لە ڕێگەی ئەم کلیپەوە جارێکی دیکە ئەم بەشەی کەلەپووری کوردی بە زیندوویی بهێڵێتەوە.
حەسەن شەریف بە یەکێک لە دەنگە دیارەکانی کورد دەناسرێت و خاوەنی چەندین ئەلبووم و ڤیدیۆکلیپە.
کلیپەکە لە دەرهێنانی کامیران بێتاسی، دەرهێنەری سینەماییە و لە تۆڕە کۆمەڵایەتییەکان و پلاتفۆرمە هونەرییەکان بڵاوکراوەتەوە و لە ماوەیەکی کەمدا پێشوازییەکی گەرمی لەلایەن هەوادارانییەوە لێکراوە.
لینکی بەرهەمەکە