دادگای لوبنان بڕیارێکی نوێی سەبارەت بە دۆسیەی هونەرمەند فەزڵ شاکر دەرکرد و دانیشتنی خوێندنەوەی بڕیاری کۆتایی بۆ 24ـی نیسانی داهاتوو دواخست.
ئەم دانیشتنە تەرخان دەکرێت بۆ بیستنی وتەی کۆتایی پارێزەرانی بەرگری و نوێنەری داواکاری گشتی، لە چوارچێوەی ئەو تۆمەتانەی ئاڕاستەی شاکر کراون کە بریتین لە هاندانی کوشتن و دابینکردنی دارایی بۆ گروپە تیرۆریستییەکان.
لە کاتی بەڕێوەچوونی دانیشتنەکەدا، لایەنی سکاڵاکار ئاماژەی بەوە کرد کە ڕۆڵی فەزڵ شاکر تەنیا لە هاندان بۆ کوشتن لە ڕێگەی بڵندگۆکانی ناو مزگەوتێکەوە بووە و لە مەیدانی شەڕەکەدا نەبینراوە.
فەزڵ شاکر لە ناو قەفەسی تۆمەتبارانەوە بەرگری لە خۆی کرد و ڕایگەیاند، ئەم وتانە دژبەری ئەو لێدوانانەن کە پێشتر لە لێکۆڵینەوەکاندا تۆمار کراون و تۆمەتەکانی بە “هەڵبەستراو” ناوبرد.
محەممەد فەزڵ شاکر، کوڕی هونەرمەندەکە، متمانەی تەواوی خۆی بە دادوەریی لوبنان دەربڕی و جەختی لەوە کردەوە کە باوکی بێتاوانە و دەبێت ڕێڕەوی یاسایی بە شێوەیەکی دادپەروەرانە بەڕێوە بچێت تا ڕاستییەکان بۆ هەمووان ڕوون ببنەوە.