سەرۆکایەتی کۆمار، ئەمڕۆ جەختی کردەوە کە هێرشەکان بۆ سەر حەشدی شەعبی و پێشمەرگە، پێشێلکارییەکی زەقە بۆ سەر سەروەری وڵات و هەڕەشەیە بۆ سەر ئاسایش و سەقامگیرییەکەی.
سەرۆکایەتی کۆمار لە بەیاننامەیەکدا بڵاویکردووەتەوە: “خەم و پەژارەی قووڵی خۆمان دەردەبڕین بۆ شەهیدبوونی فەرماندەی ئۆپراسیۆنەکانی ئەنبار لە حەشدی شەعبی و ژمارەیەک لە هەڤاڵانی لە پارێزگای ئەنبار، بەهۆی ئەو هێرشە تاوانکارییانەی کە فەرماندەیی حەشدی شەعبی لە ئەنبار و نووسینگەی حەشدی لە مووسڵ و هێرشە بەردەوامەکانی تریان لە پارێزگاکانی دیکە کردە ئامانج.”
له بەیاننامەکەدا هاتووه: سەرۆکایەتی کۆمار پرسە و سەرەخۆشی ئاراستەی کەسوکاری شەهیدان دەکات و قوربانییەکانیان لە پێناو بەرگری لە نیشتمان بە بەرز دەنرخێنێت.
* ئیدانەکردنی هێرشەکان: ئاماژەی بەوە کردووە کە ئەم هێرشانە بە هەموو پێوەرە یاسایی و مرۆییەکان شەرمەزارکراون و پێویستی بە هەڵوێستێکی نیشتمانیی یەکگرتوو هەیە بۆ ڕێگری لە دووبارەبوونەوەیان.
راشیگەیاندووە: داوا لە هەموو لایەنە سیاسییەکان دەکات ڕیزەکانیان یەکبخەن و بەرژەوەندی باڵای نیشتمانی بخەنە پێش هەموو شتێک بۆ پاراستنی عێراق لە خلیسکان بەرەو ناو جەنگ و ململانێکان.
سەرۆکایەتی کۆمار بە توندی ئیدانەی ئەو بۆردومانەی کرد کە هێزەکانی پێشمەرگەی کردە ئامانج و بووە هۆی شەهیدبوونی ژمارەیەک شەڕڤان و برینداربوونی چەندین کەسی دیکە. لە بەیاننامەکەدا هاتووە:
“هێزەکانی پێشمەرگە بوون و هەمیشە وەک کۆڵەکەیەکی سەرەکی لە سیستەمی بەرگری نیشتمانی دەمێننەوە و بە شێوەیەکی کاریگەر بەشدارییان کردووە لە ڕووبەڕووبوونەوەی تیرۆر و چەسپاندنی ئاسایش.”
لە کۆتاییدا، سەرۆکایەتی کۆمار جەختی لەسەر پێویستی ڕێزگرتن لە سەروەری عێراق و ڕەتکردنەوەی هەموو جۆرە دەستدرێژییەک بۆ سەر هێزە ئەمنییەکان کردەوە، و داوای بەهێزکردنی هەماهەنگی نێوان هەموو هێزە نیشتمانییەکانی کرد بۆ پاراستنی خوێنی ڕۆڵەکانی وڵات.