یانەی مانچستەر سیتی ئینگلیزی بە فەرمی هەوڵەکانی بۆ نوێکردنەوەی گرێبەستی فیل فۆدین، ئەستێرەی درەوشاوەی هێڵی ناوەڕاستی تیپەکەی دەستپێکردووە، ئەمەش لە کاتێکدایە کە هێشتا ساڵێک و نیو لە وادەی کۆتاییهاتنی گرێبەستەکەی ماوە کە بڕیارە لە هاوینی ساڵی 2027دا تەواو ببێت.
بەپێی ڕاپۆرتێکی ڕۆژنامەی “زەسەن”، ئەم هەنگاوەی کارگێڕیی یانەکە وەک پەیامێکی ڕوون و بەهێز لێکدەدرێتەوە بۆ پاراستنی یەکێک لە گرنگترین و کاریگەرترین بەهرەمەندەکانی ناو پێکهاتەکەیان.
سەرەڕای ئەوەی لە ماوەی ڕابردوودا فۆدین وەک پێویست لەلایەن پیپ گواردیۆلاوە پشتی پێنەبەستراوە و لە زۆرینەی یارییە چارەنووسسازەکاندا لەسەر کورسی یەدەگ بینراوە، بەڵام بەرپرسە باڵاکانی مانچستەر سیتی دووپاتی دەکەنەوە کە ئەو یاریزانە پایەیەکی سەرەکییە لە داهاتووی یانەکە و بە هیچ شێوەیەک ئامادە نین دەستبەرداری ببن.
ئەم ئەستێرە ئینگلیزییە خاوەن مێژوویەکی پڕ لە دەستکەوتە لەگەڵ “سیتیزن”، بەجۆرێک لە کۆی 364 یاری کە بە درێسی یانەکەوە ئەنجامی داون، توانیویەتی 110 گۆڵ و 64 ئەسیست تۆمار بکات، ئەمەش پێگەی ئەو وەک یەکێک لە باشترینەکانی جیهان زیاتر دەچەسپێنێت.