زیاتر لە دوو ملیۆن کەس لەسەر کەناراوەکانی “کۆپاکابانا” لە شاری ڕیۆ دی جانیرۆی بەڕازیل کۆبوونەوە بۆ بینینی کۆنسێرتە بێبەرامبەرەکەی ئەستێرەی کۆڵۆمبی شاکێرا.
ئەم ئاهەنگە کە گەورەترین کۆنسێرتە لە مێژووی هونەری شاکێرادا، وەک بەشێک لە فێستیڤاڵی “تۆدۆ مۆندۆ نۆ ڕیۆ” ئەنجامدرا کە ئامانج لێی گەشەپێدانی گەشتیارییە.
ئاهەنگەکە بە نمایشێکی ناوازەی درۆنەکان دەستی پێکرد و شاکێرا بە زمانی پورتوگالی پەیامێکی ئاراستەی هەوادارانی کرد.
بەپێی ئامارە فەرمییەکان، ئەم چالاکییە داهاتێکی ئابووری نزیکەی ١٦١ ملیۆن دۆلاری بۆ شارەکە فەراهەم کردووە، ئەمەش بەهۆی بووژانەوەی کەرتی هۆتێل و گواستنەوە.
شاکێرا لە تەمەنی ٤٩ ساڵیدا توانی بە گۆرانییە بەناوبانگەکانی وەک “Waka Waka” و “Hips Don’t Lie” جەماوەرێکی بێشومار بێنێتە جۆش و خرۆش.
بەرپرسانی شارەکە ڕایانگەیاند کە ئەم جۆرە چالاکییە گەورانە تا ساڵی ٢٠٢٨ بەردەوام دەبن بۆ ئەوەی ڕیۆ دی جانیرۆ وەک ناوەندێکی جیهانی بۆ بۆنە گەورەکان بمێنێتەوە.