وەزارەتی ناوخۆی حکومەتی هەرێمی کوردستان بڕیاریدا بە درێژکردنەوەی ماوەی تۆمارکردنی ئەو ئۆتۆمبێل و ماتۆڕسکیلانەی کە بەهۆی لێکەوتەکانی شەڕی نێوان ئەمریکا و ئێرانەوە لە پێشانگە و گەراجەکاندا مابوونەوە، هاوکات خاوەنەکانیان لە سزای دارایی دەبەخشرێن.
بەگوێرەی فەرمانێکی وزاری کە رۆژی چوارشەممە (13-5-2026) دەرچووە و ئیمزای ڕێبەر ئەحمەد، وەزیری ناوخۆی هەرێمی کوردستانی لەسەرە، ئاماژە بەوە دراوە کە لەبەر لێکەوتەکانی بارودۆخی شەڕی نێوان ویلایەتە یەکگرتووەکانی ئەمریکا و کۆماری ئیسلامیی ئێران و کاریگەرییەکانی لەسەر کەسابەت، گوزەرانی خەڵک و جووڵەی بازرگانی، بڕیارێکی نوێ درا.
لە فەرمانە وەزارییەکەدا کە ژمارە (13935)ـی لەسەرە، هاتووە: “ماوەی یەک ساڵ تۆمارکردن درێژکرایەوە بۆ ئەو بازرگان، خاوەن کۆمپانیا و پێشانگایانەی بواری هاوردەکردن و فرۆشتنی ئۆتۆمبێل و ماتۆڕسکیل کە پێش دەستپێکی شەڕەکە کاڵاکانیان هاوردە کردووە، بەڵام بەهۆی دۆخی نەخوازراوەوە لە گەراج و پێشانگاکانیان ماوەتەوە و نەتوانراوە بفرۆشرێن.”
بەپێی بڕیارەکە، ئەم ئاسانکارییە لە ڕێککەوتی دەرچوونی فەرمانەکەوە بۆ ماوەی یەک ساڵ کارایە و ئەو ئۆتۆمبێل و ماتۆڕسکیلانەی دەگرێتەوە کە بەهۆی دۆخی بازاڕەوە ساغ نەبوونەتەوە، بەمەش هیچ سزایەکی دارایی (غەرامە) ناکەوێتە سەر خاوەنەکانیان.
ئەم بڕیارەی وەزارەتی ناوخۆ دوای داواکارییەکی زۆری بازرگانان دێت کە بەهۆی ئاڵۆزییەکانی ناوچەکە و سستبوونی بازاڕ، تووشی زیانی دارایی ببوون و مەترسیی ئەوەیان لەسەر بوو بەهۆی تێپەڕبوونی ماوەی یاسایی تۆمارکردن، سزای قورسی دارایی بدرێن.