ئەمڕۆ، لەگەڵ دەستپێکردنەوەی مامەڵەکان لە یەکەم ڕۆژی هەفتەدا، بازاڕەکانی زێڕ لەسەر ئاستی جیهانیدا گۆڕانکاری نوێیان بەخۆوە بینی و نرخەکان ڕوویان لە نزمبوونەوەی زیاتر کرد، ئەمەش وەک کاردانەوەیەک بۆ سەرهەڵدانی گرژییە جیۆپۆلەتیکییە نوێیەکانی ناوچەکە و کاریگەرییان لەسەر بازاڕی وزە.
لە بازاڕە جیهانییەکاندا نرخی یەک کیلۆگرام زێڕ گەیشتە 145,971.62 دۆلار، هەروەها نرخی هەر ئۆنسەیەک زێڕ بۆ 4,540.23 دۆلار دابەزی، لە کاتێکدا نرخی یەک گرام زێڕ بە 145.97 دۆلار مامەڵەی پێوە دەکرێت.
شارەزایانی بازاڕ ئاماژە بەوە دەکەن کە هۆکاری دابەزینی ئەمڕۆی نرخی زێڕ بۆ بەرزبوونەوەی نرخی نەوت و نیگەرانییەکان لە تەشەنەکردنی هەڵاوسان دەگەڕێتەوە. ئەم دۆخەش دوای ئەوە هات کە ئیمارات ڕایگەیاند هێرشێکی درۆنی کراوەتە سەر وێستگەیەکی کارەبا، هاوکات سعودیەش ڕایگەیاند کە توانیویەتی ٣ درۆنی هێرشبەر بەرپەرچ بداتەوە؛ ئەم ڕووداوە جیۆپۆلەتیکیانە لەگەڵ سەرەتای کردنەوەی بازاڕەکاندا بوونە هۆی بازدانی نرخی نەوت، کە ئەوەش لە بەرامبەردا مەترسییەکانی هەڵاوسانی زیاتر کرد و فشاری خستە سەر نرخی زێڕ.
سەرباری ئەم پاشەکشە جیهانییە لە دەستپێکی هەفتەدا.
لە بازاڕەکانی ناوخۆدا و بەپێی نرخی فەرمی سەندیکای زێڕنگران، نرخەکان جێگیرییەکی ڕێژەییان بەخۆوە بینی ، کە بەم شێوەیە مامەڵەیان پێوە دەکرێت؛ عەیار 22 بە 1,023,472 دینار، عەیار 21 بە 976,950 دینارە و عەیار 18 بە 837,386 دینار جێگیر بووە.