پرۆسەی یەکخستنەوەی هێزەکانی پێشمەرگە دەچێتە قۆناغی کۆتاییەوە. سوپاسالاری وەزارەتی پێشمەرگە، فەریق ڕوکن عیسا عوزێری، لە کۆنگرەیەکی ڕۆژنامەوانیدا کە ئەمڕۆ سێشەممە 19-5-2026 سازکرا، گەشبینی خۆی نیشان دا کە تا مانگی ئەیلوولی ئەمساڵ تەواوی هێزەکان لە ژێر چەتری وەزارەتدا یەکبخرێنەوە.
بەپێی گوتەکانی سوپاسالار، تا ئێستا کارەکانی پێکهێنانی 8 فیرقە و فەرماندەی دەڤەری یەک بە تەواوی کۆتایی هاتووە. لە ئێستاشدا وەزارەت چاوەڕوانی لیستی ناوەکانی فیرقەی 10 و فەرماندەی دەڤەری دووە بۆ ئەوەی کۆتایی بە لایەنی کارگێڕیی پرۆسەکە بهێنرێت.
عیسا عوزێری ئاماژەی بەوە کرد کە ئەم هەنگاوانە لە چوارچێوەی یاداشتی لێکگەیشتندایە و گوتی”ئامانجی سەرەکی ئەوەیە تا 25ـی ئەیلوولی 2026 یەک هێزی نیشتمانیی یەکگرتوو لەژێر چەتری حکومەت و سەرۆکایەتیی هەرێمی کوردستاندا پێکبهێنرێت.”
جەختیشی کردەوە کە کارەکان بەپێی پلانێکی جیدی بەڕێوەدەچن و دڵنیایی دا کە لە وادەی دیاریکراودا پرۆسەکە بە فەرمی بەکۆتا دێت.
