ئێستا هۆڵیوود شایەتی گۆڕانکارییەکی گەورە دەبێت لە مۆدێلی بەرهەمهێنانی فیلمدا، کاتێک گەنجانی سەر سەکۆی یوتیوب دەبنە خاوەنی سەرکەوتنی گەورە لە بۆکس ئۆفیسدا.
فیلمی “Backrooms” کە لە دەرهێنانی کەین پالسۆنزی تەمەن 20 ساڵە، توانی لە هەفتەی یەکەمدا 81 ملیۆن دۆلار کۆبکاتەوە، لە کاتێکدا بودجەکەی تەنیا 10 ملیۆن دۆلار بووە.
ئەمە ئاماژەیەکی روونە بۆ ئەوەی کە نەوەی نوێی دەرهێنەران پێویستیان بە ستۆدیۆ گەورەکان نییە بۆ ئەوەی ناوبانگ پەیدا بکەن. جەیسۆن بلوم، بەرهەمهێنەری ناسراوی فیلمی ترسناک، لەو بڕوایەدایە، یوتیوب ئێستا بووەتە قوتابخانەیەکی ڕاستەقینە بۆ فێربوونی هونەری سینەما.
هاوکات فیلمی “Iron Lung” کە لەلایەن یوتیوبەری بەناوبانگ مارکیپڵایەر بەرهەمهێنراوە، سەرکەوتنێکی بێوێنەی بەدەستهێنا. ئەم دەرهێنەرە گەنجانە بەردەوام هەوڵ دەدەن بە کەمترین تێچوو، بەرزترین کوالێتی پێشکەش بکەن، کە ئەمەش ئالنگارییەکی گەورەیە بۆ کۆمپانیاکانی وەک دیزنی کە بودجەی زەبەلاح بۆ فیلمی وەک “The Mandalorian and Grogu” خەرج دەکەن و ئەنجامەکەی وەک پێویست نییە.
شیکەرەوەکان ئاماژەیان بۆ ئەوە کرد، نەوەی نوێی بینەران زیاتر مەیلیان بۆ ئەو چیرۆکە ڕەسەنانە هەیە کە لە ناو سۆشیاڵ میدیاوە سەرچاوە دەگرن. رووخسارە نوێیەکانی سینەما ئێستا لە ناو ژوورە بچووکەکانی خۆیانەوە فێری مۆنتاژ و وێنەگرتن دەبن و بە ورە و ئیرادەیەکی بەهێزەوە دێنە ناو کێبڕکێی جیهانییەوە.