ئاژانسی مادە هۆشبەرەکانی ئەورووپا لە نوێترین ڕاپۆرتیدا هۆشداری لە گەشەی خێرای بازاڕی مادە هۆشبەرەکان دا. شارەزایان وێڕای ئاماژەدان بە مەترسیی مادە پیشەسازییە نوێیەکان، ڕایان گەیاند باندە مافیاکان بۆ بڵاوکردنەوەی مادەکان و ئەنجامدانی کارە توندوتیژییەکان، بە شێوەیەکی بەرفراوان مێرمنداڵان ڕادەکێشن.
لۆرین نولان، بەڕێوەبەری جێبەجێکاری ئاژانسی مادە هۆشبەرەکانی ئەورووپا (EUDA) گوتی، بازاڕی مادە هۆشبەرەکان بە خێراییەکی زۆر گەشە دەکات و جۆراوجۆریی مادەکان لە شەقامەکاندا بە جۆرێکە، بەکارهێنەران بێ ئەوەی بزانن، مادەی زۆر بەهێز بەکار دێنن. بە گوێرەی ڕاپۆرتەکە، ساڵی ڕابردوو لانی کەم ٧ هەزار و ٦٠٠ کەس بەهۆی بەکارهێنانی زۆری مادە هۆشبەرەکانەوە گیانیان لەدەست دا.
لە ڕاپۆرتەکەدا هاتووە، حەشیش و کۆکاین هێشتا پڕبەکارهێنەرترین مادەن. هەروەها ئاماژە بەوە کراوە، باندە تاوانکارییەکان مێرمنداڵانی گەڕەکە هەژارنشینەکان بۆ ترساندن، لێدان و تەنانەت وەک “بکوژی بەکرێگیراو” بەکار دێنن و بەشێک لەم ڕاکێشانەش لە ڕێگەی تۆڕە کۆمەڵایەتییەکانەوە ئەنجام دەدرێت. قاچاغچییەکان لەبەر توندکردنی ڕێکارەکان لە بەندەرە گەورەکاندا، ئێستا بۆ گواستنەوەی بارەکانیان پەنا بۆ بەندەرە بچووکەکان، بەلەمی خێرا، ژێردەریایی و درۆن دەبەن.