کۆمپانیای دابەشکردنی بەرهەمە نەوتییەکانی عێراق، ئەمڕۆ ڕایگەیاند کە کارکردن بە ئەپڵیکەیشنی فرۆشتنی غازی ماڵانی بە شێوازێکی کاتی ڕاگرتووە، بە ئامانجی ئاسانکاری بۆ موکێبە حسێنییەکان و هاوڵاتیان لە سەرجەم پارێزگاکاندا بۆ دەستکەوتنی غازی چێشت لێنان لە ماوەی مانگی موحەڕەم و زیارەتی ئەربعیندا.
ڕافد سادق، بەڕێوەبەری ڕاگەیاندنی کۆمپانیاکە گوتی:
ئەم بڕیارە بۆ ئەوەیە دەرفەت بدرێتە موکێبەکان و هاوڵاتیان کە بەبێ سنووردارکردنی ئەپڵیکەیشنەکە، بڕی پێویستی غازیان بۆ ڕاپەڕاندنی کارەکانیان لەم وەرزەدا دەستبکەوێت.
گوتی: کۆمپانیاکە دڵنیایی دەدات کە ئەم ڕاگرتنە کاتییەی ئەپڵیکەیشنەکە هیچ کاریگەرییەکی خراپی لەسەر پرۆسەی دابەشکردنەکە نابێت، چونکە بڕی بەرهەمهێنانی غاز لە وڵاتدا بەشی پڕکردنەوەی تەواوی داواکارییەکانی ئێستا دەکات.
ئاشکراشی کرد: دوای کۆتاییهاتنی وەرزی مانگی موحەڕەم و مەراسیمەکانی زیارەتی ئەربعین، کارکردن بە ئەپڵیکەیشنی فەرمیی فرۆشتنی غاز وەک خۆی لێ دێتەوە و چالاک دەکرێتەوە.
