سەرچاوە میدیاییەکانی وڵاتی تورکیا بڵاویانکردەوە، ماڵی ئەکتەری ناسراو چاغاتای ئۆڵوسۆی لە ویلایەتی موغلا رووبەڕووی رووداوێکی ئاگرکەوتنەوە بووەتەوە، لە کاتێکدا لێکۆڵینەوە فەرمییەکان بۆ دۆزینەوەی هۆکاری سەرەکی دروستبوونی ئەو رووداوە بەردەوامن.
تیمی بەرگری شارستانی بە خێرایی گەیشتنە شوێنی رووداوەکە، توانیان کۆنترۆڵی تەواوی بڵێسەی ئاگرەکە بکەن، رێگرییان کرد لەوەی زیانەکە بۆ ناوچەکانی دەوروبەر و موڵک و ماڵی هاووڵاتیانی دیکە بگوازرێتەوە. راپۆرتە رۆژنامەوانییەکان دەڵێن، زیانی ماددی بە خانووەکە گەیشتووە، بەڵام تاوەکو ئێستا قەبارەی تەواوی زیانەکان بە فەرمی رانەگەیەندراوە.
تاوەکو ئێستا زانیارییەکان ناڕوونن لەبارەی ئەوەی ئایا ئەم ئەکتەرە لە کاتی رووداوەکەدا لە ناو ماڵەکەیدا بووە یان نا، هیچ لێدوانێکی فەرمی لە لایەن خۆیەوە لەم بارەیەوە بڵاو نەکراوەتەوە.
لایەنە پەیوەندیدارەکان لە شوێنی رووداوەکە خەریکی پشکنینن بۆ دیاریکردنی هۆکارەکان، لە کاتێکدا هەوادارانی چاغاتای ئۆڵوسۆی چاوەڕوانی هەواڵی نوێ دەکەن بۆ دڵنیابوونەوە لە سەلامەتی گیانی.
ئەو ئەکتەرە لەم ماوەیەی دواییدا بەشداریی چەندین کاری هونەری کردووە، لەوانە زنجیرەی تەلەفزیۆنی “Eşref Rüya” کە لە ساڵی 2025 نمایشکرا، هەروەها لە فیلمی سینەمایی “Uykucu” لەگەڵ خانمە ئەکتەر ئێلچین سانگۆ رۆڵی گێڕاوە.