بە مەبەستی ئاساییکردنەوەی بارودۆخی کولتووری و دەستپێکردنەوەی چالاكییە هونەرییەکان، ئەمڕۆ دووشەممە، ئومێد خۆشناو، پارێزگاری هەولێر، لە دیوانی پارێزگا پێشوازی لە سیروان عوسمان، بەڕێوەبەری گشتیی ڕۆشنبیری و هونەری هەولێر کرد.
بەپێی راگەیێندراوێکی بەڕێوبەرایەتیی گشتیی ڕۆشنبیری و هونەری هەولێر، تەوەرەی سەرەکیی کۆبوونەوەکە تەرخانکرا بۆ تاوتوێکردنی پلانەکان بۆ ئەنجامدانی فێستیڤاڵ و چالاکییە هونەرییە وەستاوەکان.
بڕیارە لە ئایندەیەکی نزیکدا زنجیرەیەک نمایشی فیلمی سینەمایی، فێستیڤاڵی شانۆیی، کۆنسێرتی میوزیکی و پێشانگەی شێوەکاری لە شاری هەولێر بەڕێوە بچن.
ئەم جووڵە هونەرییە نوێیە دوای ماوەیەک لە وەستانی چالاكییەکان دێت، کە بەهۆی ئاڵۆزییەکانی ناوچەکە و ئەو پەلامار و بۆردومانە ناڕەوایانەی کرابوونە سەر هەولێری پایتەخت، پڕۆژە کولتوورییەکان ڕووبەڕووی سستی و ڕاگرتن ببوونەوە.
لە کۆتایی دیدارەکەدا، پارێزگاری هەولێر جەختی لە گرنگیی پەیامی هونەر وەک ناسنامەی شارستانیی شارەکە کردەوە و هەموو پاڵپشتی و هەماهەنگییەکی دامەزراوەکانی پارێزگای بۆ سەرخستنی ئەم چالاكییانە و گەڕانەوەی گەرموگوڕی بۆ هۆڵە هونەرییەکان دووپات کردەوە.