لە بەردەوامی چالاکییەکانی وەرزی بەهارەی پڕۆژەی سینەما و جەماوەر، چەند کورتەفیلمێک لە بواری ژینگەپارێزیدا لە هەولێر نمایش کران.
چالاکییەکە ئێوارەی چوارشەممە، بە ئامادەبوونی ئومێد خۆشناو، پارێزگاری هەولێر لە سینەما ئێمپایەر بەڕێوەچوو.
ئەم چالاکییە كە لەلایەن بەڕێوەبەرایەتی هونەری سینەمای هەولێر و بە پاڵپشتی پارێزگای هەولێر ڕێکخرابوو، هەفتەی ئەمجارەیان تایبەت کرابوو بە پشتگیریکردنی “«فێستیڤاڵی کوردستان بۆ ژینگەپارێزی لەژێر ناونیشانی “هەفتەیەک بۆ ژینگەدۆستی”.
لە ڕێوڕەسمی دەستپێکردنی نمایشەکەدا، کە بەڕێوەبەری گشتیی ڕۆشنبیری و هونەری هەولێر و ژمارەیەکی بەرچاو لە هونەرمەندان، ڕۆشنبیران و هونەردۆستانی پایتەخت ئامادەی بوون، پارێزگاری هەولێر دەستخۆشی ئاراستەی سەرجەم دەرهێنەران، سینەماکاران، ژینگەپارێزان و ڕێکخەرانی ئەم رێوڕەسمە کرد بۆ سەرخستنی ئەم دەستپێشخەرییە گرنگە و هاوكات، پاڵپشتی و بەردەوامی پارێزگای بۆ ئەم جۆرە پڕۆژە و چالاکییە هونەری و ژینگەییانە دووپات کردەوە، کە خزمەت بە هۆشیاری کۆمەڵگە و پاراستنی ژینگەی کوردستان دەکەن.