لیژنەی دارایی لە ئەنجومەنی نوێنەرانی عێراق، ئەمڕۆ دووشەممە 20-7-2026، ڕایگەیاند، پڕۆژەیاسای “قەرز، بەخشین و هاوکارییەکان” دەبێتە جێگرەوەی یاسای بودجەی گشتی بۆ ساڵی 2026، و ئامادەکاری دەکرێت بۆ ئەوەی بخرێتە ناو بەرنامەی کاری دانیشتنەکانی پەرلەمانەوە.
عەدی عەواد، سەرۆکی لیژنەی دارایی پەرلەمان، لە لێدوانێکی ڕۆژنامەوانیدا ڕایگەیاند “ئەمڕۆ لیژنەکە میوانداری فالح ساری، وەزیری دارایی کردووە بۆ تاوتوێکردنی چەند پڕۆژەیاسایەک، کە گرنگترینیان یاسای قەرز و بەخشینەکانە. ئامانجی ئەم یاسایە زیادکردنی داهاتە گشتییەکانە بە جۆرێک کە پاڵپشتی گەنجینەی دەوڵەت بکات.”
عەواد ئاماژەی بەوەش کرد، ئەم یاسایە وەک بەدیلێک بۆ یاسای بودجەی 2026 بەکاردێت. لیژنەکە دوای خوێندنەوە و گفتوگۆکردن لەسەر وردەکارییەکانی لەگەڵ وەزیری دارایی، بە زۆرینەی دەنگ بڕیاریدا پڕۆژەکە ڕەوانەی سەرۆکایەتی پەرلەمان بکات بۆ ئەوەی بخرێتە کارنامەی دانیشتنەکانی داهاتوو.
سەبارەت بە ناوەڕۆکی یاساکە،.
سەرۆکی لیژنەی دارایی ڕوونی کردەوە “یاساکە میکانیزمەکانی قەرزی ناوخۆیی و دەرەکی ڕێکدەخات بەبێ ئەوەی بڕە پارەیەکی دیاریکراو وەک بناغە دیاری بکات، هەروەها دەسەڵاتی تایبەت بە وەزیرەکان و ئەنجومەنی وەزیران دەدات لە چوارچێوەی خەرجییەکاندا بەپێی یاساکە.”
هەر لە چوارچێوەی چاکسازییە داراییەکاندا، پێشتر لیژنەی دارایی ئاماژەی بەوە دابوو کە کار دەکەن بۆ جیاکردنەوەی “سەرمووچە و بەرزکردنەوەی پلەی فەرمانبەران” لە یاسای بودجە، هەروەها بڕیارە لە ساڵی 2027ەوە سیستەمی بودجەی عێراق لە “بودجەی خەرجی”یەوە بگۆڕدرێت بۆ “بودجەی بەرنامە و کارامەیی” بە مەبەستی کۆنتڕۆڵکردنی خەرجییەکان و پاراستنی سامانی گشتی.