بەرەبەیانی ئەمڕۆ پێنجشەممە، ٢ی تەمموزی ٢٠٢٦، لە ئەنجامی هێرشە مووشەکی و درۆنییەکانی ڕووسیا بۆ سەر کیێڤی پایتەختی ئۆکرانیا، لانی کەم ٨ کەس گیانیان لەدەستدا و زیاتر لە ٣٠ کەسی دیکەش بریندار بوون. هێرشەکان چەندین باڵەخانەی نیشتەجێبوونیان کردووەتە ئامانج و زیانی گەورەیان لێکەوتووەتەوە.
تیمور تکاچێنکۆ، سەرۆکی کارگێڕی سەربازی کیێڤ، ڕایگەیاند کە هێرشەکان زیانیان بە ٣٠ شوێنی جیاواز لە شارەکە گەیاندووە. هاوکات ڤیتالی کلیچکۆ، سەرۆکی شارەوانی کیێڤ، ئاشکرای کرد کە بەهۆی بەرکەوتنی ڕاستەوخۆ، شەش نهۆمی باڵەخانەیەکی نیشتەجێبوونی ٩ نهۆمی بە تەواوی ڕووخاوە و تیمەکانی فریاکەوتن لە هەوڵی بەردەوامدان بۆ دەرهێنانی ئەو کەسانەی لەژێر داروپەردەکاندا گیریان خواردووە.
بەپێی گرتە ڤیدیۆییەکان، ئاگرێکی گەورە لە هۆتێلێک و چەندین باڵەخانە لە شەقامی سەرەکی “شێڤچێنکۆ” کەوتووەتەوە و دەیان ئۆتۆمبێلیش تێکشکاون. کلیچکۆ ئاماژەی بەوەش کرد کە لە نێو بریندارەکاندا کارمەندانی ئەمبوڵانس و پزیشک هەن کە لە کاتی بەهاناوەچوونی قوربانییەکاندا بریندار بوون.
بەهۆی سەختی هێرشەکانەوە، ڤۆلۆدیمیر زێلێنسکی، سەرۆکی ئۆکرانیا، گەشتە فەرمییەکەی بۆ دبلنی پایتەختی ئێرلەندا بڕی و بە پەلە گەڕایەوە وڵاتەکەی. زێلێنسکی پێشتر هۆشداری دابوو لە ئەگەری هێرشێکی چڕی لەو شێوەیە.
لە لایەکی دیکەوە، سوپای پۆڵەندا وەک ڕێکارێکی بەرگری، فڕۆکە جەنگییەکانی خۆی بۆ ماوەیەکی کاتی خستە حاڵەتی ئامادەباشییەوە. هەروەها وڵاتی فینلاندیش چەند سنووربەندییەکی کاتی بۆ گەشتە ئاسمانییەکانی لە ناوچەی کەنداوی فینلاند ڕاگەیاند.
ئەم هێرشەی ڕووسیا بە سەختترین هێرش دادەنرێت لە دوای ناوەڕاستی مانگی حوزەیرانەوە. لە بەرامبەردا، ڕووسیا ڕایگەیاند کە حەوت درۆنی ئۆکرانییان لە ناوچەی “لینینگراد” تێکشکاندووە. هەروەها لە ناوچەی “بێلگۆرۆد”ی سنووری، بەرپرسانی ڕووسیا کوژرانی کەسێکیان بەهۆی هێرشی درۆنی ئۆکرانیاوە ڕاگەیاند.
ئەم پەرەسەندنە نوێیانە لە کاتێکدایە کە جەنگی نێوان هەردوو وڵات چووەتە پێنجەمین ساڵی خۆی و هەوڵەکان بۆ کۆتاییهێنان بە شەڕەکە تا ئێستا بێ ئەنجام بوون. توندبوونەوەی هێرشەکانی ئۆکرانیا بۆ سەر دامەزراوە نەوتییەکانی ڕووسیا، ئەو وڵاتەی ناچار کردووە بۆ دابینکردنی سووتەمەنی پەنا بۆ هاوردەکردن لە وڵاتانی دووری وەک هیندستان ببات.
رۆیتهرز