ڕۆژی دووشەممە، دەسەڵاتدارانی ڕووسیا ڕایانگەیاند کە هێرشێکی بەرفراوانی ئۆکرانیایان بۆ سەر ناوچەی مۆسکۆ پووچەڵکردووەتەوە، کە تێیدا لە ماوەی یەک شەودا زیاتر لە 400 فڕۆکەی بێفڕۆکەوان (درۆن) بەکارهێنراون. بەرپرسانی ڕووسیا جەختیان کردەوە کە بەرگرییە ئاسمانییەکانیان زۆربەی ئەو درۆنانەیان پێش گەیشتن بە پایتەخت تێکشکاندووە.
سێرگی سۆبیانین، سەرۆکی شارەوانی مۆسکۆ، لە ڕێگەی تێلیگرامەوە ڕایگەیاند: “لەنێوان کاتژمێر 8:30ی شەو تاوەکو 5:00ی بەیانی، زیاتر لە 400 درۆنی دوژمن بەرەو ناوچەی مۆسکۆ ئاڕاستە کرابوون.”
ناوبراو ڕوونیکردەوە کە هێزەکانی بەرگری ئاسمانی توانیویانە زۆربەی درۆنەکان لە دووری شارەکە ڕاو بکەن و لەناو ببەن، تەنها 85 درۆنیان لە کاتی نزیکبوونەوەیان لە سنووری مۆسکۆ خراونەتە خوارەوە.
ئەم هێرشە نوێیە لە کاتێکدایە کە گرژی و هێرشە ئاسمانییەکانی نێوان هەردوو وڵات گەیشتووەتە ئاستێکی بەرز. کیێڤ لە مانگەکانی ڕابردوودا ستراتیژی بەکارهێنانی درۆنی مەودا دووری گرتووەتە بەر بۆ لێدانی بنکە سەربازییەکان و ژێرخانە ئابوورییەکانی ناو قووڵایی خاکی ڕووسیا.
لەلایەکی دیکەوە، سوپای ڕووسیا بەردەوامە لە هێرشە موشەکییەکانی بۆ سەر ئۆکرانیا. لە نوێترین پێشهاتدا، وەزارەتی بەرگری ڕووسیا ڕایگەیاند کە هەردوو بەندەری “ئۆدیسا” و “چۆرنۆمۆرسک”یان لەسەر دەریای ڕەش کردووەتە ئامانج، وەک بەشێک لە ئۆپەراسیۆنە سەربازییە بەردەوامەکانیان.