لە کۆبوونەوەیەکدا لەگەڵ عەبدولناسر هیمەتی، پارێزگاری بانکی ناوەندیی ئێران، فالح ساری وەزیری دارایی عێراق ڕایگەیاند، داخستنی گەرووی هورمز کاریگەری و شوێنەواری نەرێنی ڕاستەوخۆی لەسەر ئابووریی عێراق بەجێهێشتووە.
لە ڕاگەیەندراوێکی وەزارەتی دارایی عێراقدا هاتوو بە ئامادەبوونی محەمەد کازم ئال سادق، باڵیۆزی ئێران لە بەغدا، وەزیری دارایی پێشوازی لە شاندی ئێرانی کردووە. لە کۆبوونەوەکەدا تاوتوێی پەیوەندییە ئابووری و داراییەکانی نێوان هەردوو وڵات و ڕێگەکانی بەهێزکردنیان کراوە.
ڕاگەیەندراوەکە ئاماژەی بەوەش کردووە، تیشک خراوەتە سەر لێکەوتەکانی داخستنی گەرووی هورمز و ئەو کاریگەرییە نەرێنییانەی کە دروستی کردوون لەسەر ئابووریی عێراق، بەتایبەتی لەسەر پرۆسەی هەناردەکردنی نەوت و هاتنی داهاتەکان.
لە بەرامبەردا، پارێزگاری بانکی ناوەندیی ئێران جەختی لەسەر ئارەزووی وڵاتەکەی کردەوە بۆ بەهێزکردنی هاوکارییە ئابووری و داراییەکان لەگەڵ عێراق و بەردەوامبوونی کاری بەکۆمەڵ بە ئامانجی پاڵپشتیکردنی سەقامگیری و گەشەی ئابووریی عێراق.