ئەمڕۆ شەممە، بانکی ناوەندی عێراق، ئەو هەواڵانەی ڕەتکردەوە کە لە تۆڕە کۆمەڵایەتییەکان و دەزگاکانی ڕاگەیاندن سەبارەت بە بەرزکردنەوەی نرخی ئاڵوگۆڕی دۆلار بەرامبەر بە دیناری عێراقی بڵاوبوونەتەوە.
بانکی ناوەندی لە لێدوانێکدا رایگەیاند: “ئەو هەواڵانەی باس لە بوونی مەیلێک یان پلانێک بۆ بەرزکردنەوەی نرخی دۆلار دەکەن، هیچ بنەمایەکی ڕاستییان نییە”، هەروەها جەختیشی کردەوە کە “هیچ بڕیارێک لەمبارەیەوە دەرنەکراوە”.
لە بەشێکی تری لێدوانەکەدا هاتووە: “نرخی فەرمی ئاڵوگۆڕ کە لەلایەن بانکی ناوەندییەوە پەسەندکراوە، هیچ گۆڕانکارییەکی بەسەردا نەهاتووە”.
بانکی ناوەندی داوای لە دەزگاکانی ڕاگەیاندن و بەکارهێنەرانی سۆشیاڵ میدیا کرد کە “وردبن لە گواستنەوەی هەواڵەکان و تەنها پشت بە سەرچاوە فەرمییەکان ببەستن بۆ وەرگرتنی زانیارییەکان سەبارەت بە سیاسەتی نەختینەیی و نرخی ئاڵوگۆڕی دراو”.