هێلکە یەکێکە لە دیارترین بژاردەکان بۆ دەستەبەرکردنی ژەمێکی دەوڵەمەند بە پرۆتین، بە جۆرێک هەر هێلکەیەکی گەورە نزیکەی 6.3 گرام پرۆتینی تێدایە. لەگەڵ ئەوەشدا، کۆمەڵێک خۆراکی دیکەی ئاژەڵیی و رووەکیی باو هەن کە لە یەک ژەمدا بڕێکی زیاتر لە پرۆتین دابین دەکەن.
بە پشتبەستن بە داتاکانی وەزارەتی کشتوکاڵی ئەمریکا و ماڵپەڕەکانی “هێڵس” و “ڤێری وێڵ هێڵس”، ئەو بژاردانە جۆرەکانی ماسی، پەلەوەر، بەرهەمە شیرەمەنییەکان و پاقلەمەنییەکان دەگرێتەوە. ئەم بەراوردکارییە پشت بە قەبارەی ژەمەکە دەبەستێت، هەروەها بڕی پرۆتین بەپێی جۆری بەرهەمەکە و شێوازی ئامادەکردنی دەگۆڕێت.
تۆنە هەر ژەمێکی نزیکەی 85 گرام لە تۆنەی سووکی لەقوتووکراو و پاڵێوراو، نزیکەی 21.7 گرام پرۆتینی تێدایە کە زیاتر لە سێ هێندەی بڕی پرۆتینی هێلکەیەکی گەورەیە. تۆنە سەرچاوەیەکی دەوڵەمەندە بە ترشە چەورییەکانی ئۆمێگا 3، ڤیتامینەکانی “ب” و سیلینیۆم. پسپۆڕان پێشنیاری هەڵبژاردنی ئەو جۆرانە دەکەن کە لە ئاودا پارێزراون و سۆدیۆمی کەمتریان تێدایە، هاوکات رەچاوکردنی رێنماییە تەندروستییەکانی تایبەت بە ماددەی جیوە گرنگە.