رۆژنامه‌نووسێكی دیار و چالاكی شاری سلێمانی كه زیاتر كاری بنكوڵكاری رۆژنامه‌نووسی ده‌كات خۆشحاڵه به‌یه‌كخستنه‌وه‌ی هێزی پێشمه‌رگه و ئاماژه به‌وه ده‌كات ئه‌م هه‌نگاوه زۆر گرنگه.
رۆژی دووشەممە 21ـی ئەیلوولی 2026، بە سەرپەرشتیی نێچیرڤان بارزانی، سەرۆکی هەرێمی کوردستان؛ مەسرور بارزانی، سەرۆکی حکوومەتی هەرێمی کوردستان و شۆڕش ئیسماعیل، وەزیری پێشمەرگە؛ رێوڕەسمی یەکخستنی تەواوەتیی هێزی پێشمەرگە دەستیپێکرد.رێوڕەسمەکە لە بارەگای سەرۆکایەتیی هەرێمی کوردستان لە هەولێر بەڕێوەچوو، تێیدا هەنگاوە سەرەکی و کۆتاییەکانی یەکخستنەوەی هێزەکانی پێشمەرگە خرایه‌روو.هەر لەبارەی یەکخستنەوەی هێزی پێشمەرگە، 10ـی ئەم مانگە شۆڕش ئیسماعیل وەزیری پێشمەرگە، کۆتایی هاتنی سەرکەوتووانەی پرۆسەی یەکخستنەوە و رێکخستنەوەی تەواوەتیی هێزەکانی پێشمەرگە لە ژێر چەتری وەزارەتەکەی راگەیاند و ئاشکراشی کرد تەواوی هێزەکانی یەکەی 70 و 80 لەسەر ئاستی یەک فەرماندەیی و کۆنتڕۆڵ، (لیوا و فیرقە و فەرماندەیی دەڤەر) رێکخراونەتەوە.
له‌م باره‌وه به‌شدار بازیانی، بۆ زاگرۆس، گوتی: “سەبارەت بە یەکگرتنەوەی هێزی پێشمەرگەی کوردستان؛ئەمە تاکە ئاواتی هەموو تاکێکی کوردە و بێگومان هەنگاوی سەرەتا ئەگەر کەموکوڕیشی هەبێت هەر گەورەیە، دروستکردنی سوپایەکی نیشتیمانی دوور لە ئایدیای ئەم حزب و ئەو حزب کە تەنها ئامانجی پاراستنی کورد و کوردستانە پیرۆزترین هەنگاوە.
ئه‌وه‌شی خسته‌روو: هەموو کوردێک لە هەرچوار پارچە و تەواوی دونیا خەون بە کوردستانێکی سەربەخۆ و بونی هێز و سوپایەکی نیشتیمانی دەبینێت یەکخەرانی سوپای کوردستان ئەرکێکی مێژوییان لە ئەستۆدایە سەرکەوتنیان شانازیە.