- وەزارەتی بەرگریی تورکیا لە ڕاگەیەندراوێکدا بڵاوی کردەوە، هێرشەکانی ئەم دواییەی هێزەکانی سووریای دیموکرات (هەسەدە) بۆ سەر هێزەکانی حکوومەتی سووریا لە مەنبج و گوندەکانی حەلەب، جارێکی دیکە بە ڕوونی سەلماندیان هەسەدە پابەندی ئەو ڕێککەوتنە نییە لە ١٠ی ئاداردا لەگەڵ حکوومەتی سووریا واژۆی کردووە. وەزارەتەکە هەسەدەی بە مەترسی بۆ سەر ئاشتی و سەقامگیریی ناوچەکە و خودی سووریا لە قەڵەم دا.
هەروەها وەزارەتەکە ئاماژەی بەوەش داوە، تورکیا بۆ پاراستنی سەقامگیری و ئاسایشی سووریا و ئارامیی ناوچەکە، لە هەماهەنگیی نزیکی لەگەڵ حکوومەتی سووریا بەردەوام دەبێت، بەتایبەتی لە شەڕی دژی ڕێکخراوە تیرۆریستییەکان. جەختیشی کردەوە، وڵاتەکەی تەنیا پشتگیری لە پرەنسیپی “یەک دەوڵەت، یەک سوپا” لە سووریا دەکات.
