وەزارەتی دادی عێراق ڕایگەیاند کە بەشێکی تایبەتی چاکسازییان بۆ زیندانییە عەرەب و بیانییەکان دابین کردووە، ئاماژەی بەوەش کرد کە یاداشتی لێکتێگەیشتن لەگەڵ ئەو وڵاتانە واژۆ دەکەن کە دەیانەوێت زیندانییەکانیان وەربگرنەوە، جگە لەوانەی سزای لەسێدارەدانیان بۆ دەرچووە.
ئەحمەد لعێبی، وتەبێژی وەزارەتەکه ڕایگەیاند: “بەشی تایبەت بە زیندانییە عەرەب و بیانییەکانمان هەیە، کە لەناو هەموو زیندانەکانی بەغدا و پارێزگاکاندا دابەشکراون. ئەم زیندانییانە بەپێی ڕەگەزنامە، جۆری تاوان، سروشتی حوکمەکەیان و ڕادەی مەترسیدارییان پۆلێن کراون.”
راشیگەیاند: وەزارەتی داد لەگەڵ کەسوکاری زیندانییەکان و نێردە دیپلۆماسییەکانی وڵاتەکانیان هەماهەنگی دەکات بۆ ڕێکخستنی سەردانی ساڵانە، ئەمەش لە ڕێگەی پێشکەشکردنی داواکاری بۆ وەزارەتی دەرەوە و نووسینگەی وەزیری داد دەبێت.
گوتی: وەزارەتی داد یاداشتی هاوکاری یان ڕێککەوتن لەگەڵ ئەو باڵیۆزخانانە واژۆ دەکات کە دەیانەوێت زیندانییەکانیان بگوازنەوە بۆ وڵاتەکانی خۆیان بۆ تەواوکردنی ماوەی سزاکەیان.
لعێبی ئاشکرای کرد: ئەم ڕێککەوتنانە هەموو جۆرە حوکمێک دەگرێتەوە، تەنها ئەو زیندانییانە نەبێت کە سزای لەسێدارەدانیان بۆ دەرچووە، ئەوان ناگوازرێنەوە.