ئەمڕۆ پێنجشەممە، ١١ـی حوزەیرانی ٢٠٢٦، بازاڕەکانی کانزا گرانبەهاکان بەردەوامبوون لەسەر هێڵە دابەزیوەکەیان و نزمبوونەوەیەکی بەرچاوی دیکەیان بەخۆوە بینی؛ نرخی زێڕ لەسەر ئاستی جیهانی و بازاڕەکانی ناوخۆدا بە ڕێژەیەکی خێرا هاتووەتە خوارەوە، لە کاتێکدا بازاڕی زیو کەمێک ڕووی لە جێگیربوون و بەرزبوونەوەی ڕێژەیی کردووە.
لە بازاڕە جیهانییەکاندا، نرخی یەک ئۆنسە زێڕ زیاتر دابەزی بۆ 4,088.71 دۆلار، یەک کیلۆگرام بە 131,455.08 دۆلار و یەک گرامیش بە 131.46 دۆلار مامەڵەی پێوە دەکرێت.
هاوکات لە بازاڕەکانی ناوخۆشدا و بەپێی نرخی فەرمی سەندیکای زێڕنگران، عەیارەکان نزمبوونەوەی پێوانەیی تریان تۆمارکرد و چوونە ژێری هێڵی پێشوویانەوە؛ عەیارەی ٢٢ بە 929,395 دینار، عەیارەی ٢١ بە 887,149 دینار و عەیارەی ١٨ بە 760,414 دینار مامەڵەی پێوە دەکرێت.
لەلایەکی دیکەوە، بازاڕی زیو بە پێچەوانەی زێڕەوە کەمێک هەڵکشا، بە جۆرێک لە ئێستادا نرخی هەر ئۆنسەیەک زیو گەیشتووەتە 63.92 دۆلار، هەر کیلۆگرامێک بە 2,055.11 دۆلار مامەڵەی پێوە دەکرێت و نرخی هەر گرامێکیش لەسەر 2.06 دۆلار جێگیر بووە.
شارەزایانی دارایی ئاماژە بەوە دەکەن کە بەردەوامیی دابەزینی نرخی زێڕ گرێدراوی ئەو گۆڕانکاری و جێگۆڕکییە خێرایەیە کە لە نێوان کڕیاران و فرۆشیارانی بۆرسە جیهانییەکاندا ڕوودەدات، کە هێشتا لەژێر کاریگەریی پێشهاتە سیاسییەکان و دۆخی ئابووری گشتیدا، دەیانەوێت هاوسەنگیی دارایی خۆیان لە بازاڕەکاندا بپارێزن.