وەزارەتی شارەوانی و گەشتوگوزاری حکوومەتی هەرێمی کوردستان ڕایدەگەیەنێت، پرۆسەی دابەشکردنی زەوی بەسەر فەرمانبەراندا بەخێرایی بەردەوامە و تا ئێستا ژمارەی زەوییە دابەشکراوەکان 100 هەزار پارچەی تێپەڕاندووە. هاوکات بڕیارە هەفتەی داهاتوو وەجبەی هەشتەمی دابەشکردنی زەوی لە شاری هەولێر دەست پێبکات.
سەربەست مەولوود، بەڕێوەبەری گشتیی یاسایی لە وەزارەتی شارەوانی ئاشکرای کرد، پرۆسەی وردبینیکردنی ناوی فەرمانبەران لە قۆناغی کۆتاییدایە و لەو چوارچێوەیەشدا وەزارەتی پێشمەرگە 2 هەزار ناوی نوێی ڕەوانە کردووە. ڕوونیشی کردەوە پاش ئەوەی وردبینی بۆ مەرجی (8 ساڵ خزمەت) بۆ ئەو ناوە نوێیانە دەکرێت، ڕەوانەی ئەنجومەنی وەزیران دەکرێن بەمەبەستی وەرگرتنی ڕەزامەندیی کۆتایی.
سەبارەت بە چارەنووسی فەرمانبەرانی گرێبەست، ناوبراو ئاماژەی بەوە دا کە فۆرمی تایبەتیان بۆ ئامادەکراوە. لە ئێستادا وەزارەت چاوەڕێی گەیشتنی ڕێنماییە نوێیەکان لە ئەنجومەنی وەزیرانەوە دەکات تاوەکو بە هەمان ڕێکار و مەرجەکانی فەرمانبەرانی هەمیشەیی، پرۆسەی دابەشکردنی زەوی ئەوانیش بگرێتەوە و لێی سوودمەند ببن.
پرۆسەی دابەشکردنی زەوی بەسەر فەرمانبەرانی هەرێمی کوردستاندا وەک یەکێک لە بڕیارەکانی کابینەی نۆیەم بەردەوامیی هەیە و لایەنە پەیوەندیدارەکانیش هەوڵەکانیان چڕکردۆتەوە بۆ ئەوەی لە کورتترین کاتدا تەواوی ئەو فەرمانبەرانەی مەرجەکان دەیانگرێتەوە، فۆرمی زەوییەکانیان بەدەست بگات.