پێش یارییەکەیان بەرامبەر ڤالانسیا هانسی فلیکی راهێنەری یانەی بەرشەلۆنە لە کۆنگرەیەکی رۆژنامەنوسیدا کۆمەڵێک زانیاری لەبارەی دۆخی تیپەکەیەوە خستەڕوو. سەبارەت بە لامین یاماڵ ڕاهێنەرە ئەڵمانییەکە ئاشکرایکرد کە ناوبراو بە تەنها و لە هۆڵی وەرزشی کۆتا ڕاهێنانی ئەنجامداوە بەهۆی ئەوەی هەستی بە هەندێک ئازار کردبوو، بەڵام لەگەڵ تیپەکەدا گەشت دەکات و ئەگەری زۆرە بەشداری یارییەکە بکات.
لە بەشێکی تری قسەکانیدا، فلیک باسی لە سیستەمی دیاریکردنی کاپتنەکانی یانەکەی کرد و ڕایگەیاند کە خۆی و ستافی ڕاهێنەرایەتی بەشدارییان لەم پرۆسەیەدا کردووە؛ سەرەتا دوو کاپتنی وەک رافینیا و پێدرییان دیاریکردوە، پاشان لەسەر ناوەکانی ئێریک گارسیا و فرینکی دی یۆنگ و لامین یاماڵیش یەکلابوونەتەوە. سەبارەت بە ڕکابەرەکانیش، ئاماژەی بەوەدا کە ڕیاڵ مەدرید بەرامبەر ڕیاڵ بێتیس ئاستێکی زۆر باشی پێشکەش کرد و هەلی زۆری دروستکرد، بەڵام تۆپی پێ هەمیشە بەو شێوەیە نییە کە مرۆڤ چاوەڕێی دەکات.
فلیک جەخت کردەوە کە پێویستە ئەوان تەنها سەرنجیان لەسەر خۆیان و شێوازی یارییکردنی خۆیان بێت بە ڕێژەی لەسەدا سەد، و هۆشداری دا کە یارییەکەیان بەرامبەر ڤالانسیا قورسە و کەشوهەواکەی گەرم دەبێت، بەڵام ئەمە نابنە بیانوو بۆیان. هەروەها دڵخۆشی خۆی بە ئاستی گابرێل جیسۆس دەربڕی و ڕایگەیاند کە چێژێکی زۆری لە ڕاهێنانەکانی وەرگرتووە، و سەرەڕای ئەوەی هێشتا بە تەواوی ئامادە نییە، بەڵام دەتوانێت بۆ چەند خولەکێک یاریی بکات چونکە یاریزانێکی ئارامە لەبەردەم گۆڵدا و حەز بە شێوازی یارییکردنی دەکات.
لە کۆتایی قسەکانیدا، ڕاهێنەرەکەی بەرشەلۆنە دوپاتیکردەوە کە ئێستا پێکهاتەیەکی نایابیان هەیە، بەڵام ئەوەی لە ئێستادا گرنگە تەنها بردنەوەیە لەپێناو بەدەستهێنانی نازناوەکان بۆ یانەکە، و لە کۆتایی وەرزدا دەتوانن بڕیار لەسەر ئەوە بدەن کە ئایا ئەم تیپە باشترە لە ساڵانی ڕابردوو یان نا.