بەگوێرەی ئامارە حکوومەتییەکان، ئۆکرانیا لەم مانگەدا زۆرترین ڕێژەی قوربانییانی مەدەنیی لە شەڕی ڕووسیادا تۆمار کردووە.
هێرشەکانی ڕووسیا لەم مانگەدا بوونە هۆی کوژرانی ٣٧٧ مەدەنی و برینداربوونی ٢ هەزار و ١٢٩ کەسی دیکە؛ ئەمەش لە نیسانی ٢٠٢٢ـەوە خوێناویترین مانگی شەڕەکەیە.
ڤۆلۆدیمێر زێلێنسکی، سەرۆکی ئۆکرانیا گوتی ڕووسیا تەنها لە هەفتەی ڕابردوودا نزیکەی هەزار و ٧٠٠ درۆن، زیاتر لە هەزار و ٦٣٠ بۆمبی ئاراستەکراو و ٥٠ مووشەکی بالیستیکی بەکار هێناوە.
ناوبراو داوای لە هاوپەیمانەکانی کرد سیستمی بەرگریی ئاسمانیی زیاتریان بۆ بنێرن. لە بەرانبەردا ئۆکرانیا هێرشەکانی بۆ سەر ژێرخانی وزەی ڕووسیا بەردەوام کردووە و چەندین پاڵاوگەی کردووەتە ئامانج.
دامەزراوەی خوێندنی شەڕ لە واشنتن ڕایگەیاند زۆرێک لە ناوچەکانی ڕووسیا و بەشە داگیرکراوەکانی ئۆکرانیا بەدەست کەمیی سووتەمەنییەوە دەناڵێنن.
