یانەی مانچستەر سیتیی ئینگلیزی پیلانێکی تایبەت دادەڕێژێت بۆ گواستنەوەی فرێنکی دی یۆنگی ناوەڕاستکاری هۆڵەندی و یانەی بەرشەلۆنە، ئەمەش تاوەکو دوای گەڕانەوەی یاریزانەکە لە پێکان لەگەڵیدا بکەوێتە گفتوگۆوە.
بەپێی ڕاپۆرتێکی ڕۆژنامەی ئێل ناسیۆناڵ، بەرپرسانی مانچستەر سیتی لە بەرنامەیاندایە لە بازاڕی گواستنەوەی زستانە و لە مانگی یەکدا هەنگاوی فەرمی بۆ گواستنەوەی ئەو یاریزانە بنێن، ئەگەر تاوەکو کۆتاییی بازاڕی گواستنەوەی هاوینەی ئێستا نەتوانن هیچ ناوەڕاستکارێکی تر بخەنە ریزەکانیانەوە.
ئەم هەنگاوەی مانچستەر سیتی لە کاتێکدایە کە یانەی بەرشەلۆنە بەهۆی دۆخی دارایییەوە ئامادەیە گوێ لە دەستپێشخەرییەکان بگرێت بە مەبەستی ڕێکخستنەوەی هاوسەنگیی بودجەکەی. لەلایەکی تریشەوە، سەرەڕای بوونی توانای بەهێز لەو پێگەیەدا، سیتی چاوی لە تواناکانی ئەم ئەستێرە هۆڵەندییە بڕیوە.