فەرماندەیی ناوەندیی سوپای ئەمریکا (سێنتکۆم) لە ئۆپراسیۆنێکی بەردەوامدا بۆ چڕکردنەوەی گەمارۆ دەریاییەکانی سەر ئێران، تا ڕێکەوتی 2ـی ئەیلوول ڕێڕەوی 86 کەشتیی بازرگانی بە زۆر گۆڕیوە و دەستی بەسەر چەندین کەشتیی دیکەدا گرتووە، ئەمەش هاوزەمانە لەگەڵ بەردەوامیی هێرشە ئاسمانییەکانی ئەمریکا بۆ سەر ژێرخانی سەربازیی ئێران.
بەگوێرەی دوایین ئامارەکانی سێنتکۆم، ڕێکارە دەریاییەکان لە تەنگەی هورمز و ئاوەکانی ناوچەکە بەراورد بە 28ـی ئاب (کە 82 کەشتی بوو) ڕووی لە زیابوون کردووە. لە چوارچێوەی ئەم هەڵمەتەدا بۆ ڕێگریکردن لە گەیشتنی هاوکاری بە تاران، هێزەکانی ئەمریکا جگە لە گۆڕینی ڕێڕەوی ئەو 86 کەشتییە، 3 کەشتییان پەکخستووە و چوونەتە سەر 2 کەشتیی دیکەش بە مەبەستی پشکنینی ورد.
ئەم گەمارۆ دەریاییە هاوکاتە لەگەڵ ئۆپراسیۆنێکی بەرفراوانی سەربازیی ئەمریکا لەناو خاکی ئێراندا، کە تێیدا بنکەکانی سوپای پاسداران، سیستەمەکانی بەرگریی ئاسمانی، ڕادارەکان و ناوەندەکانی چاندنی مینی دەریایی کراونەتە ئامانج و لەناو براون.
شارەزایانی سەربازی پێیان وایە توندکردنی ئەم گەمارۆیە و بەئامانجگرتنی توانا دەریاییەکانی ئێران، ئاماژەیە بۆ ستراتیژێکی نوێی ئەمریکا بۆ پەکخستنی تەواوەتیی جووڵە سەربازی و ئابوورییەکانی تاران لە ناوچەکەدا.