ماهر حەماد جوهان، بریکاری وەزارەتی پلاندانانی عێراق، ئەمڕۆ لەگەڵ شاندێکی حکومەتی هەرێمی کوردستان بە سەرۆکایەتیی ئومێد سەباح، سەرۆکی دیوانی ئەنجومەنی وەزیرانی هەرێم، کۆبووەوە بۆ تاوتوێکردنی ڕەشنووسی یاسای بودجەی گشتیی فیدراڵی بۆ ساڵی ۲۰۲۷ و جێگیرکردنی شایستە داراییەکانی هەرێم.
تەوەرەکانی کۆبوونەوەکەی بەغدا:
بەپێی ڕاگەیەندراوێکی وەزارەتی پلاندانان، لە کۆبوونەوەکەدا بەردەوامی درا بە تاوتوێکردنی بودجەی وەبەرهێنانی ساڵی داهاتووی ۲۰۲۷ و دۆزینەوەی ئامرازەکانی زامنکردنی پشکی هەرێم لە بودجەدا.
هەروەها تەرخانکراوەکانی پڕۆژە وەبەرهێنانەکان، بودجەی گەشەپێدانی پارێزگاکان و تەرخانکراوەکانی بودجەی بەگەڕخستن بۆ ساڵی ۲۰۲۷ خسترانە بەر باس.
ئامانجەکانی سەردانی شاندی هەرێم بۆ بەغدا:
ئەم کۆبوونەوەیە هاوکاتە لەگەڵ ڕاگەیەندراوێکی شهوی سێشەممەی حکومەتی هەرێمی کوردستان کە تێیدا هاتبوو شاندێکی باڵا گەیشتووەتە بەغدا بۆ ئەنجامدانی زنجیرەیەک کۆبوونەوە لەگەڵ بەرپرسانی باڵای وەزارەتە فیدراڵییەکان.
ئامانجی سەرەکیی سەردانەکە بەشداریی ڕاستەوخۆی حکومەتی هەرێمە لە ئامادەکردنی ڕەشنووسی یاسای بودجەی فیدراڵی بۆ ساڵی ۲۰۲۷ و جێگیرکردنی پشک و شایستە داراییەکانی هەرێمی کوردستان لە ڕۆشنایی دەستووری عێراقدا.
تەوەرە سەرەکییەکانی دانوستان و داواکارییەکانی هەرێم:
شاندی هەرێمی کوردستان لە کۆبوونەوەکاندا دیدگا و داواکارییەکانی هەرێم دەخاتە ڕوو دەربارەی شایستە داراییەکانی مووچەخۆران، میلاکات و پلە وەزیفییەکانی فەرمانبەران، تەرخانکراوی پڕۆژەکانی وەبەرهێنان و گەشەپێدانی هەرێمەکان، بودجەی بەگەڕخستن، جگە لە دۆسیەی نەوت.
شاندەکە هەوڵ دەدات لە ڕێگەی کۆبوونەوەکانەوە بگاتە لێکگەیشتن و ڕێککەوتنی هاوبەش لەگەڵ حکومەتی فیدراڵی بۆ چەسپاندنی ماف و شایستە داراییەکانی هەرێم لە بودجەی ساڵی ۲۰۲۷دا.