کۆمپانیای هیسای چینی، کە لە بواری تەکنەلۆژیای هەستەوەری و نەخشەی سێ رەهەندیدا پسپۆڕە، کامێرایەکی نوێی ئاشکراکرد. کامێراکە بۆ کۆکردنەوەی داتای شوێن دیزاین کراوە و یارمەتیی مەشقپێکردنی سیستەمەکانی زیرەکیی دەستکرد دەدات، کە لە رۆبۆتە مرۆڤئاساکاندا بەکاردێن.
هیسای رایگەیاند، ئامێرە نوێیەکە ناوی کۆزمۆیە و هەستەوەری لیدار و کامێرا لەخۆ دەگرێت. ئامانجی ئامێرەکە یارمەتیدانی گەشەپێدەرانە بۆ کۆکردنەوەی داتای واقیعی دەربارەی ئەو شوێن و تەنانەی دەوروبەری رۆبۆتەکان بە شێوەیەکی بەتواناتر.
لە میانەی نمایشکردنی تەکنەلۆژیاکە لە شەنگهای، هیسای روونیکردەوە، داتای نەخشە وردەکان یارمەتیی رۆبۆتێکی شاربا رۆبۆتیکسی داوە ئایسکرێم بە ئۆتۆماتیکی لە یەکێک لە لقەکانی دێری کوین پێشکەش بکات. کۆمپانیاکە رایگەیاند، رۆبۆتەکە 99%ـی سەرکەوتنی لەو ئەرکەدا بەدەستهێناوە.
کۆمپانیاکان هەوڵ دەدەن لە بەکارهێنانە سنووردارەکانی رۆبۆت، وەک دەست راوەشاندن و بەخێرهێنانی سەردانیکەران، تێپەڕن و بەرەو جێبەجێکردنی ئەرکی پراکتیکیی ئاڵۆزتر لە ژینگەی کار و خزمەتگوزاریدا هەنگاو بنێن.
هیسای پێشبینییەکانی داهاتی کامێرا نوێیەکەی ئاشکرا نەکرد، بەڵام رایگەیاند، رێککەوتنی لەگەڵ کۆمپانیا چینییەکانی بواری رۆبۆت واژۆکردووە بۆ ئەوەی ئامێرەکە بەکاربهێنن.