ئەمڕۆ دووشەممە، میدیاکانی ئێران ڕایانگەیاند، تەرمی قوربانیانی ڕووداوی هێلیکۆپتەرەکەی، ئیبراهیم ڕەئیسی سەرۆککۆماری ئێران و ئەمیر حوسێن عەبدوڵڵاهیان وەزیری دەرەوە و شاندی یاوەریان دۆزرایەوە.
کەناڵی ئەلعالەمی سەر بە حکوومەت،گرتەیەکی ڤیدیۆیی بڵاوکردەوە، کە تیایدا ئاماژە بەوە دەکات، تەرمی قوربانیانی کەوتنەخوارەوەی فڕۆکەکەی سەرۆککۆماری ئێران و هاوەڵەکانی دۆزراونەتەوە.
لە ڤیدیۆکەدا کۆمەڵێک کارمەندی فریاگوزاری دەرکەوتووە کە تەرمێکیان لە ناوچەیەکی دارستانیدا هەڵگرتووە.
مانگی سووری ئێران ڕایگەیاند، تیمی فریاگوزاری، لاشەی ئیبراهیم ڕەئیسی، سەرۆککۆماری ئێران و هەشت کەسی دیکەی ناو هێلیکۆپتەرەکەیان دۆزییەوە.
سەرۆکی مانگی سووری ئێران، پیر حوسێن کۆلیوەند، لە کەناڵی فەرمی دەوڵەت ڕایگەیاند، “ئێمە تەرمی مردووان دەگوازینەوە بۆ تەورێز”، ناوەندی پارێزگای ئازەربایجانی ڕۆژهەڵات، گوتیشی: ئۆپەراسیۆنەکانی گەڕان و پشکنینی کۆتایی هات.
هاوکات لەگەڵ ڕەئیسی و عەبدوڵڵاهیان، پارێزگاری ئازەربایجانی ڕۆژهەڵات، مالیک ڕەحمەتی و پێشونوێژ و پارێزگای تەورێز، محەمەد عەلی ئال هاشم، لەگەڵ پێنج کەسی دیکە لە تیمی هێلیکۆپتەرەکە و شاندی سەرۆکایەتی کۆمار لەناو کۆپتەرەکەدا بوون.
ڕەئیسی لە 18ی حوزەیرانی 2021 لە خولی یەکەمی دەنگداندا هەڵبژێردرا و چووە جێگەی حەسەن ڕۆحانی، سەرۆککۆماری پیشووی ئێرانی گرتەوە.