کۆمپانیایەکی چینی وەبەرهێنان لە کەرتی کارەبای هەرێمی کوردستان دەکات و پڕۆژەی بەرهەمهێنانی کارەبا بە وزەی خۆر پێشکەش دەکات.
وەزارەتی کارەبا بڵاوی کردەوە: “کەمال محەمەد ساڵح، وەزیری کارەبا، پێشوازی لە میس لی، بەرپرسی گەورە کۆمپانیای پۆشنی چینی و شاندی یاوەری کرد، کە بەمەبەستی ئەنجامدانی پڕۆژەی بەرهەمهێنانی کارەبا بە وزەی خۆر سەردانی وەزارەتیان کردووە.”
ئاماژه بەوەش کراوە: “وەزیری کارەبا پاڵپشتیی و کارئاسانی وەزارەتی کارەبای بۆ دانانی وێستگەی کارەبا بە سیستەمی وزەی خۆر خستەڕوو.”
جەختیش کراوەتەوە: “وەزیری کارەبا ئامادەیی وەزارەتیشی نیشاندا بۆ پێشکەشکردنی کارئاسانی بۆ کۆمپانیاکانی کارەبا کە ئێستا 20 مێگاوات کارەبا لە پڕۆژەکانی وەزارەت و کەرتی تایبەت بەرهەم دەهێندرێت و بەبڕی 75 مێگاواتی دیکە چووەتە واری جێبەجێکردنەوە.”