لیژنەی باڵای سەرپەرشتیاری فێستیڤاڵی نێودەوڵەتی شانۆی شەقام، رۆژی سێشەممە لە شاری کەرکووک بە مەبەستی دەستپێکردنی ئامادەکارییەکانی فێستیڤاڵ، کۆبوەوە و سەردانی پارێزگاری کەرکووکی کرد.
لە کۆبوونەوەکەدا، دەلیل جەمال، بەڕێوبەری نووسینگەی وەزیری رۆشنبیری و لاوان دوای گەیاندنی رێز و پێزانینی وەزیری رۆشنبیری و لاوان بۆ هەوڵەکانی سازدانی فێستیڤاڵ، رایگەیاند، وەزارەت بەو پەڕی بایەخەوە کار بۆ سەرخستنی فێستیڤاڵی نێودەوڵەتی شانۆی شەقام لە کەرکووک دەکات.
لە بەشێکی دیکەی کۆبوونەوەکەدا، هەنگاوەکانی رێکخستن و ئامادەکاری فێستیڤاڵ تاوتوێ کران و هێڵی گشتیی کارکردن و لیژنە سەرەکی و لاوەکییەکان بڕیاریان لە بارەوە درا.
دواتر لیژنەی باڵای سەرپەرشتیار، سەردانی دیوانی پارێزگای کەرکووکیان کرد و داوایان کرد، پشتیوان و هاوکاری لە سەرخستنی فێستیڤاڵەکە بێت و پارێزگاری کەرکووک پشتیوانیی و هاوکاری بۆ سەرخستنی فێستیڤاڵەکە دەربڕی.
