وەزارەتی دارایی حكوومەتی عێراق ئاماژە بەوە دەدات، لیستی مووچەی مانگی 10ى فەرمانبەرانی هەرێمی کوردستانيان بەدەست گەیشتووە و ئەگەر تێبینی و سەرنجیان نەبێت، لە 24 كاتژمێری داهاتوودا پارەی پێویست بۆ خەرجكردنی مووچە دەنێرن.
وەزارەتی دارایی حکوومەتی عێراق ڕایگەیاندووە، ئەمڕۆ دووشەممە 4/11/2024، لیستی مووچەی مانگی 10ى فەرمانبەرانی هەرێمی کوردستانيان بەدەست گەیشت، هەر لەبارەی مووچەی مانگی 10وە، سەرچاوەیەک لە وەزارەتی دارایی عێراق بە كەناڵی (كوردستان 24) ڕاگەیاندووە: “ئێستا لە وەزارەتی دارایی وردبینیکردنی لیستەکە دەستی پێکردووە، ئەگەر هیچ تێبینی و سەرنجێک لە لیستی مووچە نەبێت، ئەوە لە 24 کاتژمێری داهاتوودا پارەی پێویستی بۆ خەرجکردنی مووچەی مانگی 10 دەنێردرێت.”
دوێنێ یەکشەممە 3/11/2024، وەزارەتی دارایی و ئابووریی حكوومەتی هەرێمی كوردستان لە ڕاگەیاندراوێكی فەرمییدا ڕایگەیاند، لیستی مووچەی مانگی 10ـی فەرمانبەران و مووچەخۆرانی هەرێمی کوردستان لەلایەن نوێنەری وەزارەتەکەیانەوە ڕادەستی بەڕێوەبەرایەتیی گشتیی ژمێریاری لە وەزارەتی دارایی حکوومەتی عێراق کراوە.
ئەمە لە کاتێکدایە، ڕۆژی هەینی 18/10/2024، دەست بە دابەشکردنی مووچەی مانگی ئەیلوول 9ـی فەرمانبەرانی هەرێمی کوردستان کرا، ڕۆژی پێنجشەممە 24/10/2024، کۆتایی بە دابەشكردنی مووچە هات.