سەرکۆمار ئەردۆغان ڕایگەیاند: “کاتی ئەوە هاتووە بە ژانەکانی ١٥٠ ساڵی ڕابردوو و بە تایبەت نیو سەدەی ڕابردوو بڵێن ‘بەسە’. ئیتر کاتی هاتووە شتی نوێ بگوترێت”.
ڕەجەب تەیب ئەردۆغان، سەرکۆماری تورکیا و سەرۆکی “پارتی داد و گەشەپێدان” (ئاکپارتی)، لە هەشتەمین کۆنگرەی ئاسایی پارتەکەی لە دیاربەکر بەشداریی کرد.
بە گوێرەی هەواڵی ئاژانسی “ئەنادۆلو”، ئەردۆغان لەسەرەتای قسەکانیدا کەم کۆنگرەیە گوتی: “ئەوانەی هەوڵ دەدەن بۆ بەرژەوەندییە ئیمپریالیستەکانیان کەڵک لە هاودۆزانی سەلاحەدین ئەیووبی وەربگرن، دوژمنی هاوبەشی هەموومانن”.
ئەردۆغان گوتیشی: “ئەحمەد عاریف گوتەنی، ڕێگە نادەین ئەو مارانە یەکگرتوویی گەلەکەمان، یەکپارچەیی نیشتمانەکەمان و هێزەی تاسەری دەولەتەکەمان بخۆن”.
سەرکۆماری تورکیا هەروەها گوتی: “بە ئومێدی خوا لە قۆناغی کۆتایی پێهێنانی دوا یاریی ئیمپریالیستین کە نیوە سەدەیە ژانیان بۆ ئەو گەلە بەرهەم هێناوە و داهاتوویان ڕەش کردووە. کاتی ئەوە هاتووە بە ژانەکانی ١٥٠ ساڵی ڕابردوو و بە تایبەت نیو سەدەی ڕابردوو بڵێن ‘بەسە’. ئیتر کاتی هاتووە شتی نوێ بگوترێت”.
گوتیشی: “لە ژانی دایکانی دیاربەکر بە باشی تێدەگەم کە پێنج ساڵە لە هەوڵدان بۆ گەیشتن بە منداڵەکانیان کە لە لایەن ڕێکخراوی جوداخوازەوە بە زۆر ڕفێندراون”.
سەرکۆماری تورکیە، هەروەها گوتی: “لەگەڵ دەستپێکی ستراتیژی وشککردنی تیرۆر لە سەرچاوەکەیەوە، ڕێکخراوی تیرۆریستی خوێن و هێزێکی زۆری لە دەست داوە. ئیتر ئەوە زانراوە ڕێکخراوی تیرۆریستی پشتی بە هەر شتێک ببەستێت، شانسی ئەوەی نییە بەرانبەر دەوڵەتی تورکیا بوەستێتەوە. بەمەبەستی کۆتاییهێنان بە تیرۆر بۆ هەتاهەتایە، دەرفەتێکی نوێ و گرنگی دیکە بۆ وڵاتەکەمان هاتووەتە ئاراوە. ئەمە بە ڕاست نازانم ئەم دەرفەتە لەدەست بدەین”.