کۆمپانیای پاراماونت پیکچەرز، بەیاننامەیەکی دژی زیاتر لە 3900 کەسایەتیی پیشەسازیی فیلمسازی بڵاوکردەوە کە بەڵێنیان دابوو بایکۆتی دامەزراوە سینەماییەکانی ئیسرائیل بکەن، لەنێویاندا ئەستێرەی دیاری وەک ئێما ستۆن، خواکین فینیکس و مارک روفالۆ.
کۆمپانیاکە لە بەیاننامەیەکدا رایگەیاند: “لە پاراماونت، ئێمە باوەڕمان بە هێزی گێڕانەوەی چیرۆک هەیە بۆ پەیوەستکردن و ئیلهامبەخشین بە خەڵک و بەهێزکردنی لێکتێگەیشتن.”
کۆمپانیاکە بایکۆتکردنی هونەرمەندانی ئیسرائیلی رەتکردەوە و گوتی: “بێدەنگکردنی هونەرمەندانی داهێنەر لەسەر بنەمای نەتەوەییان، نە دەبێتە هۆی لێکتێگەیشتن و نە خزمەت بە دۆزی ئاشتی دەکات”.
ئەمە لە کاتێکدایە کە زیاتر لە 3900 کەسایەتیی دیاری سینەما و تەلەڤزیۆن، لەوانە براوەی خەڵاتەکانی ئۆسکار و ئیمی، واژۆیان لەسەر بەڵێننامەیەک کردووە بۆ بایکۆتکردنی ئیسرائیل. لەنێو واژۆکاراندا ناوی ئەکتەرانی وەک ئۆلیڤیا کۆڵمان، مارک روفالۆ و سینسیا نیکسۆن دەبینرێت.
لە بەڵێننامەکەدا هاتووە: “دادگەی دادی نێودەوڵەتی، کە بەرزترین دادگەی جیهانە، بڕیاری داوە کە مەترسیی جینۆساید لە غەززە هەیە و داگیرکاری و سیاسەتی رەگەزپەرستانەی ئیسرائیل دژی فەلەستینییەکان نایاساییە. بەرگریکردن لە یەکسانی و دادپەروەری ئەرکێکی ئەخلاقییە.”