ڕوانگەی سووریایی بۆ مافەکانی مرۆڤ ڕایگەیاند، هێزە ئەمنییەکانی سەر بە حکومەتی سووریا نۆ هاووڵاتی سڤیلیان لە گوندی عەین ئەلحەیات لە دەڤەری قرداحە، سەر بە پارێزگای لازقیە، دەستگیر کردووە. هۆکاری دەستگیرکردنی ئەو هاووڵاتییانە ئاشکرا نەکراوە.
بەگوێرەی زانیارییەکان، ئەم دەستگیرکردنانە دوای ئەوە هات کە ئەندامانی ئاسایشی گشتی هەوڵیان دا تاوانبارێک بگرن، بەڵام تاوانبارەکە بەرگری کرد و لە ئەنجامدا ئەندامێکی ئاسایشی گشتی بە سەختی بریندار بوو. دواتر گوندەکە بە تەواوی گەمارۆ درا و ژمارەیەک هاووڵاتی سڤیل دەستگیر کران. پاش ئەم ڕووداوە، هێزەکانی حکومەتی گواستنەوە دەستیان بە هەڵمەتێکی فراوانی دەستگیرکردن کرد لە گوندەکانی ڕەیحان، بەکراما، بەشلاما و قەرەندا.
ئەم دەستگیرکردنانە دێنە چوارچێوەی هەڵمەتێکی فراوانتر کە لەلایەن دەسەڵاتدارانی نوێی سووریاوە دەستی پێ کراوە، دوای ڕووخانی ڕژێمی ئەسەد لە ٨ی کانوونی یەکەمی ٢٠٢٤. ئەم هەڵمەتە کە هەردوو ناوچەی کەنار دەریا و ناوچەکانی دیکەی سووریای گرتووەتەوە، تێیدا ژمارەیەک لە بەرپرسانی پێشوو و کەسانی نزیک لە ڕژێمی ئەسەد دەستگیر کراون. ڕوانگەی سووریایی بۆ مافەکانی مرۆڤ ڕای گەیاندووە کە لە مانگی تشرینی یەکەمی ٢٠٢٥دا، لانیکەم ١٩٧ حاڵەتی دەستگیرکردنی ناڕەوا لە سووریا تۆمار کراوە، و جەخت لەسەر پێویستیی داڕشتنی ڕێسای یاسایی دەکاتەوە بۆ کۆتاییهێنان بە دەستگیرکردنی ناڕەوا و دیارنەمانی زۆرەملێ.