ئەستێرەی ناوداری بۆلیوود، شارۆخان، یەکەمین دیمەنەکانی فیلمە نوێیەکەی بە ناوی “King” بڵاوکردەوە و ڕایگەیاند کە فیلمەکە لە ٢٤ی کانوونی یەکەمی ٢٠٢٦ نمایش دەکرێت. لە تیزەری فیلمەکەدا، وشەی “ROAR” (نەڕە) بە شێوەیەکی دراماتیکی دەردەکەوێت و دروشمی “لەم کریسمسەدا، ترس سەرکەوتووە” دەبینرێت، ئەمەش ئاماژەیە بۆ ئەوەی فیلمەکە پڕ دەبێت لە ئەکشن و توندوتیژی.
شارۆخان بە ستایلێکی نوێ و دەموچاوێکی خوێناوییەوە دەردەکەوێت کە کەسایەتییەکی بەهێز و بێبەزەیی نیشان دەدات.
فیلمەکە لە دەرهێنانی سیدهارث ئاناندە و جگە لە شارۆخان، دیپیکا پادوکۆن و جایدیپ ئەهلاوات ڕۆڵی تێدا دەگێڕن. خاڵی سەرنجڕاکێش ئەوەیە کە “سوهانا خان”ی کچی شارۆخان بۆ یەکەمجار ڕۆڵێکی سەرەکی و گرنگ لەگەڵ باوکیدا دەگێڕێت.
پێشبینی دەکرێت “King” ببێتە یەکێک لە گەورەترین بەرهەمەکانی سینەمای هیندستان لە ساڵی ٢٠٢٦، بەو پێیەی بودجەیەکی زەبەلاحی بۆ تەرخانکراوە و چاوەڕوانییەکی زۆری لەسەرە.