ئومێد خۆشناو، پارێزگاری هەولێر لە چوارچێوەی سەردانە فەرمییەکەیدا بۆ باکووری کوردستان، سەردانی بارەگای سەرەکیی پارتی یەکسانی و دیموکراسی گەلان (دەم پارتی) لە شاری ئامەد کرد.
ئەمڕۆ چوارشەممە، 13ـی ئایاری 2026، ئومێد خۆشناو، پارێزگاری هەولێر لە پەراوێزی بەشداریکردنی لە “کۆڕبەندی ئاشتیی کۆمەڵایەتی و ئازادی” کە لە شاری ئامەد بەڕێوەدەچێت، لەگەڵ بەرپرسانی دەم پارتی کۆبووەوە.
لە دیدارەکەدا، گفتوگۆ لەبارەی کاراکردنی بەشداریکردن لە پانێڵەکانی کۆڕبەندەکەدا کرا، بە ئامانجی چەسپاندنی دادپەروەری، سەروەریی یاسا و قووڵکردنەوەی بنەماکانی ئاشتی لە ناوچەکەدا.
هەر بەگوێرەی زانیارییەکان، تەوەرێکی دیکەی کۆبوونەوەکە تایبەت بوو بە پەرەپێدانی پەیوەندییە فەرهەنگی، کۆمەڵایەتی و ئابوورییەکانی نێوان پارێزگای هەولێر و شارەوانیی گەورەی ئامەد.
پارێزگاری هەولێر و بەرپرسانی دەم پارتی جەختیان لە گرنگیی “گفتوگۆی بنیاتنەر” و “پێکەوەژیانی ئاشتیانە” کردەوە و وەک تەنیا ڕێگەچارە بۆ بەدیهێنانی سەقامگیریی سیاسی و گەشەپێدانی کۆمەڵایەتی لە ناوچەکەدا وەسفیان کرد.
سەردانەکەی ئومێد خۆشناو بۆ ئامەد لە کاتێکدایە، کە پارێزگاری هەولێر بە مەبەستی بەشداریکردن لە چەند چالاکییەکی فەرهەنگی و سیاسی لە باکووری کوردستانە و بڕیارە لە چەند پانێڵێکی تایبەت بە ئاشتی و پێکەوەژیان لە شارەکەدا بەشدار بێت.