پۆلیسی بەریتانیا تۆمی ڕۆبنسن، چالاکوانی ناسراوی ڕاستڕەوی توندڕەو و دژە ئیسلامی، لە فڕۆکەخانەی هیترۆی لەندەن دەستبەسەر کرد و دەستی بەسەر ئامێرە ئەلیکترۆنییەکانیدا گرت.
ڕۆژی شەممە ١٤ی حوزەیرانی ٢٠٢٦، تۆمی ڕۆبنسن (کە ناوی ڕاستەقینەی ستیڤن یاکسلی-لینۆنە) دوای گەڕانەوەی لە ڕووسیاوە بۆ بەریتانیا، لە فڕۆکەخانەی هیترۆ لەلایەن پۆلیسەوە ڕاگیرا. دەستبەسەرکردنەکەی لەژێر “یاسای دژە تیرۆر و ئاسایشی سنوورەکان”دا بووە و بۆ ماوەی سێ کاتژمێر لێکۆڵینەوەی لەگەڵدا کراوە.
ئەم ڕێکارەی پۆلیس دوای ئەوە دێت کە لە هەفتەی ڕابردوودا، ڕۆبنسن لە ڕێگەی تۆڕە کۆمەڵایەتییەکانەوە بە چڕی پۆستی دەربارەی پشێوی و ئاژاوەگێڕییەکانی شاری “بێلفاست” لە ئیرلەندای باکوور دەکرد. ئەو پشێوییانە دوای بڵاوبوونەوەی ڤیدیۆی هێرشێکی چەقۆ بۆ سەر هاووڵاتییەک دەستی پێکرد، کە تێیدا پیاوێکی سودانی بە تۆمەتباری سەرەکی نیشان درا.
سیاسەتمەدارانی بەریتانیا و ئیرلەندا، چالاکوانانی ڕاستڕەوی توندڕەو تۆمەتبار دەکەن بەوەی لە ڕێگەی ئینتەرنێتەوە هانی خەڵکیان داوە بۆ هێرشکردنە سەر ماڵ و بزنسی کەمینە نەتەوەییەکان و کۆچبەران، کە وەزیری کاروباری ئیرلەندا ئەو کارانەی بە “گەوجێتیی ڕەگەزپەرستانە” وەسف کرد.
رۆیتهرز