سوپای عێراق جەختی کردەوە کە بە چڕی کار دەکات بۆ
پاراستنی سەقامگیری ناوخۆیی و ڕێگە نادات خاکی وڵاتەکەی ببێتە شوێنی دەستپێکردنی هێرش بۆ سەر دەوڵەتانی دیکەی ناوچەکە یان دەستوەردان لە کاروباریان، هاوکات پابەندبوونی خۆی بە یەکخستنی بڕیاری ئەمنی و خستنەژێری سەرجەم پێکهاتە چەکدارەکان بۆ ژێر دەسەڵاتی دەوڵەت دووپاتکردەوە.
لەم چوارچێوەیەدا، سەباح نوعمان، گوتەبێژی فەرماندەی گشتی هێزە چەکدارەکانی عێراق ڕایگەیاند، کۆڵەکەی سەرەکی و ستراتیژی کارنامەی وزاری بریتییە لە بەهێزکردنی ئاسایشی نەتەوەیی لە ڕێگەی “کۆنترۆڵکردنی چەک لەژێر دەستی دەوڵەت و جێبەجێکردنی سەروەری یاسا”، ئەمەش وەک هەنگاوێکی بنەڕەتی بۆ کۆتاییهێنان بە دیاردە چەکدارییەکانی دەرەوەی چوارچێوەی یاسا.
سەباح نوعمان لە لێدوانێکیدا بە ئاژانسی هەواڵی عێراقی ڕاگەیاند، کارنامەی حکومەت ڕێکاری توند لەخۆدەگرێت بۆ یەکخستنی بڕیاری ئەمنی و بەستنەوەی سەرجەم توانا و سەرچاوەکان بە دەوڵەتەوە، ئەمەش بە ئامانجی ڕێگریکردن و دەستوەردان لەدەسەڵات.
گوتەبێژەکە جەختیشی کردەوە کە بژاردەی ڕاست دوورخستنەوەی عێراقە لە ململانێکانی ناوچەکە.
گوتیشی، وڵاتەکە پشت بە دیپلۆماسییەکی پێشوەختە دەبەستێت بۆ بەڕێوەبردنی پەیوەندییەکان بە شێوازێکی هاوسەنگ، بە جۆرێک کە ڕێگە نەدرێت عێراق ببێتە ڕێڕەو یان بنکەیەک بۆ هێرشکردنە سەر وڵاتانی تر و لە بەرامبەریشدا ڕێگە بە هیچ دەوڵەتێک نادرێت دەستوەردان لە کاروباری ناوخۆی عێراقدا بکات.
لە کۆتاییدا، سەلاح نوعمان ڕوونیکردەوە، دیدگای ئەمنی نوێ پشتبەستن بە تەکنەلۆجیای هاوچەرخ دەبێت، لەوانەش بەهێزکردنی ئاسایشی سنوورەکان و پەرەپێدانی سیستمەکانی چاودێری، هاوشان لەگەڵ هەوڵە هەواڵگرییەکان بۆ بەرەنگاربوونەوەی تیرۆر و تاوانی ڕێکخراو و وشککردنی سەرچاوەکانی داراییان.
