لیژنەی یاسایی لە ئەنجومەنی نوێنەرانی عێراق، بە سەرۆکایەتی دکتۆر ڕێبوار هادی، سەرۆکی لیژنەکە، کۆبوونەوەیەکی تایبەتی بۆ تاوتوێکردنی ژمارەیەک پڕۆژەیاسای گرنگ ئەنجامدا.
لە کۆبوونەوەکەدا، لیژنەی یاسایی جەختی لە چڕکردنەوەی هەوڵەکانی کردەوە بە مەبەستی کاراکردنی زیاتری ڕۆڵی یاسادانان و چاودێری پەرلەمان. تەوەرێکی سەرەکی کۆبوونەوەکە تەرخانکرا بۆ ئەنجامدانی خوێندنەوەی یەکەم بۆ “پێشنیازی هەمواری سێیەمی یاسای یەکێتی مافپەروەران” ژمارە ١٣٧ی ساڵی ١٩٨١.
ئەم هەنگاوەی لیژنەی یاسایی بە ئامانجی ڕێکخستنەوە و بەرزکردنەوەی پێگەی مافپەروەران دێت، بڕیاریشە دوای تەواوکردنی ڕێکارە یاساییەکان، پڕۆژەیاساکە ئاڕاستەی سەرۆکایەتی پەرلەمان بکرێت بۆ ئەوەی بخرێتە کارنامەی کۆبوونەوەکانی داهاتووی ئەنجومەنی نوێنەران و دەنگی لەسەر بدرێت.