ئەنجوومەنی وەزیرانی عێراق بە سەرۆکایەتیی عەلی زەیدی، سەرۆکوەزیرانی عێراق، بەرنامەی گشتگیری حکوومەتی بۆ ساڵانی 2026 تا 2029 پەسەند کرد و بە مەبەستی دەنگدان و بڕیاردان لەسەری رەوانەی پەرلەمانی کرد؛ بەرنامەکە لە 139 بڕگەی سەرەکی پێکدێت و وەک نەخشەڕێگایەک بۆ ئەنجامدانی گۆڕانکاریی ریشەیی و تێپەڕاندنی تەنگژەکان ئەژمار دەکرێت.
بەرنامە نوێیەکەی حکوومەت ئامانجییەتی کۆتایی بە سەردەمی پشتبەستنی تەنیا بە داهاتی نەوت بهێنێت، ئەوەش لە ڕێگەی،سەردەمیانەکردنی سیستمی دارایی و باری بانکی، هەروەها زیادکردنی وەبەرهێنان لە سەرچاوە سروشتییە نانەوتییەکاندا، بە دیجیتاڵکردنی خێرای خزمەتگوزارییەکان و بەهێزکردنی ئاسایشی زانیاری، دامەزراندنی ئەنجوومەنی باڵای وەبەرهێنان و سەقامگیریی دارایی بە مەبەستی ڕاکێشانی سەرمایەی ناوخۆیی و بیانی.
لە بواری ئەمنی و سیادیدا، بەرنامەکە چەند هەنگاوێکی جدی لەخۆدەگرێت، یەکەم: یەکخستنی سەرجەم هێزە چەکدارەکان لەژێر چەتری یاسایی دەزگاکانی دەوڵەتدا، دووم: پاراستنی سەربەخۆیی بڕیاری سیاسیی عێراق لە ئاستی ناوچەکە و جیهاندا وەک هێمای سەروەریی وڵات.
لە ڕەهەندە کۆمەڵایەتی و خزمەتگوزارییەکاندا، حکوومەت بەڵێنی داوە سەرنجی سەرەکی بخاتە سەر بەرەوپێشبردنی بوارەکانی پەروەردە، تەندروستی، ڕێگاوبان، ژێرخانی ئاو و ژینگە. هاوکات جەخت لە پاراستنی مافەکانی مرۆڤ و منداڵان، ڕووبەڕووبوونەوەی هەژاری و بەهێزکردنی ڕۆڵی ژنان لە ناوەندەکانی بڕیارداندا کراوەتەوە تاوەکو داهاتووی عێراق لەسەر بنەمایەکی هاوچەرخ دابمەزرێت.