د چارچۆڤێ چالاکییێن هەلکەفتا ١٦ێ تەباخێدا، ل دهۆکێ بەلگەفیلمێ (عەر عەر و سەیێن عەجاجی) هاتە نمایشکرن، کو باس ل چیرۆکێن دلتەزێن یێن ئەشکەنجەدان و کۆمکوژکرنا کوردان ل زیندانا نوگرە سەلمان دکەت.
ب هەلکەفتا سالرۆژا دامەزراندنا پارتی دیموکراتی کوردستان و ژدایکبوونا سەرۆک مەسعوود بارزانی، ئەڤرۆ پێنجشەمبی ١٣ێ تەباخا ٢٠٢٦ێ، ب ئامادەبوونا د.عەلی تەتەر، پارێزگارێ دهۆکێ و سەباح بەیتوللا، جێگرێ بەرپرسێ مەکتەبا ڕێکخستنا پارتی ل دهۆکێ و د.نەوزاد عەبدوللا، بەرپرسێ لقێ ئێک، دگەل هەژمارەکا بەرپرسێن حزبی و حکومی، تۆرا میدیایی یا کوردستان و لقێ ئێک یێ پارتی بەلگەفیلمێ (عەر عەر و سەیێن عەجاجی) ل هۆلا لقێ ئێک نمایشکر.
ئەڤ فلمە تیشکێ دئیخیتە سەر ژیان و وان ئازار و ئەشکەنجەیێن سەدان وەلاتییێن کورد یێن ل زیندانا ناڤبری ل سەمەوا هاتینە بێسەروشوێنکرن و کۆمکوژکرن.
د پشکەکا دی یا ڕێورەسمان دا، پارێزگارێ دهۆکێ خەلاتێن ڕێزلێنانێ پێشکێشی ستاف و دەرهێنەرێ فلمی کر و ب شێوەیەکێ تایبەت ڕێز ل خودانا چیرۆکا فلمی “فەزیلە محەمەد” گرت. ئەو ژنا کو پشتی ٣٨ سالان ژ لێگەریانێ، شیابوو تاوانبارێ مەزن یێ ب “عەجاجی” ناسکری ببینیتەڤە و بدەتە دادگەهێ دا کو سزایێ تاوانێن خوە وەربگریت.
ئەڤ بەلگەفیلمە وەکو بەشەک ژ دۆکیۆمێنتکرنا تاوانێن دڕندانە یێن ڕژێما بەعس ل دژی گەلێ کورد دهێتە هەژمارتن، دا کو نەوەیێن نوو ئاگەهداری وان نەهامەتییان بن یێن ب سەرێ مللەتێ مە هاتین.