ئهڤرۆ ڕۆژا پێنجشهمبی، ١٣ێ تهباخا ٢٠٢٦ێ، ل هۆلا دهستهیا بنگههێ لالش یێ ڕهوشهنبیری و كۆمهڵایهتی ل باژێرێ دهۆكێ، ب ئامادهبوونا “د. عهلی تهتهر” پارێزگارێ دهۆكێ و “میر حازم تهحسین بهگ” میرێ ئێزدیان، ڕێوڕهسمێن سالڤهگهڕا وان كۆمكۆژییێن ل دژی خوشك و برایێن ئێزدی هاتینه ئهنجامدان، هاتنه گێڕان.
د ڤان ڕێوڕهسمان دا، كو ب ئامادهبوونا “دكتۆره ڤیان سلێمان” هاریكارا بهرپرسێ مهكتهبا ڕێكخستنا پارتی دیمۆكراتی كۆردستان ل دهۆكێ و هژمارهكا كهسایهتییێن ئۆلی، ئاینی، جڤاكی و كهسوكارێن سهربهرزێن شههیدان بڕێڤهچوو، سالڤهگهڕا ١٩ێ یا كۆمكۆژیا ل دژێ ئێزدیان ل سالا ٢٠٠٧ێ ل (گرعزێر و سیپاشێخدرێ) ژ لایێ تیرۆرستێن ئهلقاعیده ڤه، و سالڤهگهڕا ١٢ێ یا جینۆسایدا گوندێ (كۆچۆ) ل سالا ٢٠١٤ێ ژ لایێ تیرۆرستێن داعش ڤه، هاتنه ساخكرن.
د. عهلی تهتهر، پارێزگارێ دهۆكێ د پهیڤهكێ دا بهحس ل دیرۆكا پڕ ژ قوربانیدان یا گهلێ كۆرد و ئهو زنجیره تاوان و جینۆسایدێن ب سهرێ پێكهاتهیان هاتین كر و ڕاگهاند: “ئهو زۆلم و زۆردارییا ل خوشك و برایێن مه یێن ئێزدی هاتیه كرن، برینهكا كیوره د جهستێ ههموو كۆردستانێ دا.”
ههروهسا پارێزگارێ دهۆكێ جهخت ل سهر گرنگیا تهبایی و ئێكگرتنێ كر و داخواز ژ ههموو پێكهاتهیێن ئاینی و نهتهوهیی كر كو ههردهم كۆردستانی بن. ناڤبری ڕووهێ كرە گهنجان و گۆت: “پێدڤییه گهنجێن مه بێ جوداهی، ههست ب بهرپرسیاریا پاراستنا ئاخ، ئالا و پیرۆزییێن كۆردستانێ بكهن و پارێزگاریێ ل ڤی كولتوورێ پێكڤهژیانێ بكهن یێ كو كۆردستان پێ دهێته نیاسین.”
ئهڤ یاده د دهمهكێ دایه كو هێشتا شوونوارێن وان تاوانان ل سهر دهڤهرێن شنگال و دهوروبهر دیارن و جهخت ل سهر ئاڤاكرنا وان دهڤهران و ڤهگهڕیانا ئاواران بۆ سهر زێدێ باب و كالێن وان هاته كرن.